Ձերբակալվել են Հրաչյա Սարգսյանի թիմակիցները

Այսօր առավոտյան Հակակոռուպցիոն կոմիտեի կողմից ձերբակալվել են Երեւանի քաղաքապետարանի աշխատակազմի նախկին ղեկավար Սեյրան Մեջլումյանը եւ ճարտարապետության և քաղաքաշինության վարչության պետի տեղակալ, վարչության պետի պաշտոնակատար Դավիթ Դալլաքյանը։

Այս տեղեկությունը Irakanum.am-ի հետ զրույցում հաստատեց Հակակոռուպցիոն կոմիտեի մամուլի խոսնակ Մարինա Օհանջանյանը, հավելելով, որ վերջիններս ձերբակալվել են իրենց մոտ քննվող քրեական գործի շրջանակներում։ Այլ մանրամասներ Օհանջանյանը չհայտնեց, ասելով, որ ավելի ուշ կոմիտեն հանդես կգա հայտարարությամբ։

Նշենք, որ Մեջլումյանն օրեր առաջ աշխատանքից ազատման դիմում էր գրել։ Նա նախկին քաղաքապետ Հրաչյա Սարգսյանի թիմակիցն է։