Ջեքսոնի մահվան մեջ մեղադրվող բժիշկն ազատ կարձակվի մինչ Ծննդյան տոները

Մեկ տարի էլ չի անցել, ինչ Լոս Անջելեսի դատարանը աշխարհահռչակ երգիչ Մայքլ Ջեքսոնի անձնական բժշկին դատապարտեց չորս տարվա ազատազրկման՝ երգչի մահվան մեջ մեղադրելով:

Ամերիկյան մամուլում շրջանառվող լուրերի համաձայն՝ բժիշկը, հնարավոր է, Սուրբ Ծննդյան տոներին ազատության մեջ հայտնվի:

Կոնրադ Մյուրեն համարվում է Ջեքսոնի մահվան հիմնական մեղավորը՝ 2009 թվականի հունիսին երգչին մեծ չափաբաժնով ցավազրկող ներարկելու համար:

2011 թվականի նոյեմբերին չկանխամտածված սպանության համար Մյուրեին դատապարտվեց 4 տարվա ազատազրկման։ Սակայն, օրերս նրա դատապաշտպանը լրատվամիջոցներին հայտնել է, որ իր պաշտպանյալն ազատ կարձակվի՝ բանտում անցկացնելով ընդամենը 13 ամիս՝ 48-ի փոխարեն:

Դատապաշտպանը նաև հաստատել է, որ Ջեքսոնի բժիշկը սկսել է գիրք գրել իր նախկին «հիվանդի» մասին՝ հայտնում է news.guru.ua-ն: