Կայացավ «Սիրիահայերի հիմնախնդիրները համակարգող կենտրոն» ՀԿ-ի շնորհանդեսը

Հոկտեմբերի 26-ին Առնո Բաբաջանյան համերգասրահում կայացավ «Սիրիահայերի հիմնախնդիրները համակարգող կենտրոն» հասարակական կազմակերպության շնորհանդեսը։

Սիրիահայ նվիրյալների նախաձեռնությամբ 2012 թվականի հոկտեմբերի 15-ին կյանքի կոչվեց «Սիրիահայերի հիմնախնդիրները համակարգող կենտրոն» հասարակական կազմակերպությունը։

Կազմակերպության շնորհանդեսին ներկա էր ՀՀ Նախագահի տիկին Ռիտա Սարգսյանը, միջազգային և համահայկական կազմակերպությունների ներկայացուցիչներ, պաշտոնատար անձինք, սիրիահայեր:

ՀՀ սփյուռքի նախարար Հրանուշ Հակոբյանը սիրով ու ջերմությամբ ողջունեց Մայր հայրենիքում հաստատված սիրահայերին և հավելեց. «ՀՀ Նախագահ Սերժ Սարգսյանի քաղաքական կամքով և դիրքորոշմամբ է, որ Հայաստանում բոլոր պետական կառավարման մարմիններն այսօր պարտավոր են, պատրաստ են և լուծում են Ձեր կողմից բարձրացված հարցերը, խնդիրները, որպեսզի դուք Հայրենիքում Ձեզ զգաք ինչպես սեփական տանը։ Այսօր Սիրիայում մեր հայրենակիցները տագնապի մեջ են: Աշխարհասփյուռ ողջ հայությունը, Հայոց պետությունը կանգնած է Հայաստանում ապրող և Սիրիայում գտնվող մեր հայրենակիցների կողքին։ Մենք անելու ենք հնարավոր ամեն ինչ՝ թեթևացնելու ձեր հոգսերը»։

Ելույթի վերջում նախարար Հրանուշ Հակոբյանը շնորհակալություն հայտնեց ՀՅԴ կուսակցությանը «Օգնիր եղբորդ» հետաքրքիր ծրագրի համար, ՀԲԸՄ-ին, ՀՄԸՄ-ին, սիրիահայերին աջակցող բոլոր կազմակերպություններին: Բեմ հրավիրվեցին նորաստեղծ կառույցի ղեկավարներ Լենա Հալաջյանը, Վազգեն Յակուբյանը, Նորա Փիլիպոսյանը։

Այնուհետև միջոցառման մասնակիցներն ունկնդրեցին Երևանի «Կիլիկեան» վարժարանի սաների, սիրիահայ երիտասարդների և Հալեպի «Կոմիտաս» լարային նվագախմբի, ՀՀ վաստակավոր երգչուհի Նունեն Եսայանի ելույթները։

Հարկ է նշել, որ կազմակերպությանը նյութական աջակցություն է ցուցաբերել «Վիվասել-ՄՏՍ» ընկերությունը՝ նվիրաբերելով գրասենյակի համար անհրաժեշտ բազմաթիվ պարագաներ, համակարգչային տեխնիկա:

Հասարակական կազմակերպությանը նյութական աջակցության պատրաստակամություն է հայտնել նաև «Հայռուսգազարդ» ընկերությունը:

Ներկաները հնարավորություն ունեցան ծանոթանալու նաև սիրիահայ լուսանկարիչների գործերի ցուցադրությանը: