Երիտասարդ Երկրապահների մոմավառությունը ԱԺ-ում (տեսանյութ)

Այսօր երեկոյան երիտասարդ երկրապահների ջոկատը մոմավառություն էր կազմակերպել Ազգային Ժողովում։

«Այսօր հոկտեմբերի 27-ի ոճրագործության 13-րդ տարելիցն է, երբ 13 տարի առաջ տեղի ունեցավ այս ոճրագործությունը, մենք դեռ երիտասարդ էինք շատ և ամբողջությամբ, խորությամբ չընկալեցինք, թե ինչ կատարվեց, երբ կրակեցին Վազգեն Սարգսյանի, Կարեն Դեմիրճյանի և այլ պետական գործիչների վրա, կրակեցին մեր հանրապետության վրա: Այսօր մենք կանք, կան երիտասարդ երկրապահները, կան պատանի երկրապահները, կա սպարապետի գործը, կան սպարապետի գործը շարունակողները։ Եվ ինչպես այսօր Եռաբլուրում ասաց Արցախի հերոս զորավար Մանվել Գրիգորյանը, քանի դեռ կան երիտասարդ երկրապահները, պատանի երկրապահները, վազգենները, մենք ապրելու ենք ազատ և անկախ հանրապետությունում»,- նշեց Երիտասարդ երկրապահ կազմակերպության նախագահ Էդգար Բարսեղյանը։

Իսկ այն հարցին, թե որտեղ թերացան մեր իշխանություն ու կառավարությունը, որ տեղի ունեցավ այս ոճիրը մեր իրականությունում, պատասխանեց. «Պետք չէ ման գալ թերացողներ, որովհետև թերացել ենք մենք բոլորս, այդ ոճրագործությունը կատարվել է»։ Իսկ այն հարցին, թե ինչ պետք է անենք, որ մեր իրականությունում նման դեպքերը չկրկնվեն,  ասաց. «Մենք պետք է համախմբվենք մի հարցի շուրջ, մի խնդրի շուրջ և դա մեր պետականությունն է, մեր միասնությունն է. եթե լինենք միասին, տենց խնդիրներ չենք ունենա»։
Եվ վերջում նշեց, ինչպես ասել է սպարապետ Վազգեն Սարգսյանը՝ «21-րդ դարը մերն է լինելու»։