ՀՀ-ում հավատարմագրված դիվանագետները վաղը կայցելեն Ադրբեջանի կողմից գնդակոծության ենթարկված Երասխ. Արարատ Միրզոյան

Գաղտնիք չէ, որ բոլոր ընթացող բանակցություններին զուգահեռ Ադրբեջանը մշտապես փորձում է ուժի գործադրմամբ փոխել բանակցությունների ընթացքը, խաթարել դրանք, եւ ի վերջո, ՀՀ-ին պարտադրել այն լուծումները, որն իրեն, եւ գուցե միայն իրեն է ցանկալի: Այս մասին այսօր՝ հունիսի 14-ին, ԱԺ-ում հայտարարեց ԱԳ նախարար Արարատ Միրզոյանը՝ հավելելով, որ սա առաջին նման դրսեւորումը չէ:

«Այլ հարց է, որ մենք եւ միջազգային հանրությունը պետք է շատ կտրուկ դիրքավորվենք։ Կամ մենք բանակցում ենք բարի կամքով՝ հանգելու փոխընդունելի լուծումների, կամ եթե ուժի գործադրմամբ է՝ մեզ համար նման գործընթացն անընդունելի է: Հուսով ենք՝ նաեւ միջազգային հանրության համար է անընդունելի»,-ասաց նա:

Արարատ Միրզոյանը հայտարարեց, որ Հայաստանի միջազգայնորեն ճանաչված սահմանները պետք է մնան անխախտելի, ՀՀ տարածքային ամբողջականությունը պետք է վերականգնվի եւ միջազգային հանրությունն էլ պետք է դերակատարում ունենա այս հարցում. «Կոնկրետ Երասխի պարագայում մի նոր նրբերանգ էլ կա: Նախապես հայտարարվել էր, որ այնտեղ մետալուրգիական գործարան է կառուցվում եւ նախնական գնահատականներով այն էականորեն նպաստելու է ՀՀ տնտեսական զարգացմանը: Եվ ահա, Ադրբեջանը նախ կեղծ բնապահպանական մեղադրանքներով հանդես եկավ, որից հետո հնչեց հայկական կողմից հերքում: Հայկական կողմի այս հայտարարությունից հետո ադրբեջանական կողմը փորձում է պարզապես կրկին  ուժի գործադրմամբ խափանել այս դեպքում այս ծրագիրը: Սա ոչ միայն ոտնձգություն է Հայաստանի սահմանների նկատմամբ, ոչ միայն հրադադարի խախտում է, այլ նաեւ զուտ անհիմն մեղադրանքներ հնչեցնելով, կեղծ հիմնավորում տակը դնելով, խաթարել մի ծրագիր, որը կարող է նպաստել Հայաստանի տնտեսական զարգացմանը»,-ընդգծեց նախարարը:

Արարատ Միրզոյանը հավելեց, որ բազմիցս Ադրբեջանի ղեկավարությունը այլ դերակատարների ներկայությամբ ստանձնել է հավելյալ պարտավորություն՝ չդիմել ուժի կիրառման. «Այսօր Երասխի այդ հատված է մեկնել ԵՄ մշտադիտարկման առաքելությունը, վաղը մեր հրավերով այնտեղ ներկա կգտնվեն նաեւ ՀՀ-ում հավատարմագրված միջազգային դիվանագիտական կորպուսի ներկայացուցիչներ, եւ հարցը կպահենք նրանց ուշադրության կենտրոնում»,-ասաց նա: