Ամեն օր, ժամը 10-ի հատվածում, հենց մարդիկ մտնում են այգի` սկսում են կրակել․ Ճարտարի քաղաքապետ

Արցախի Մարտունու շրջանի Ճարտար քաղաքի հարակից՝ օկուպացված տարածքում տեղակայված ադրբեջանական դիրքերից երեկ կրակ են բացել «Ղուրուսու» կոչվող տեղամասի խաղողայգիներում սրսկման աշխատանքներ իրականացնող քաղաքացիների ուղղությամբ։ Ինչպես «Փաստինֆո»-ի հետ զրույցում ասաց Ճարտարի քաղաքապետ Վլադիկ Հովհաննիսյանը, ադրբեջանցիներն ամենօրյա ռեժիմով են կրակում այգիներում, դաշտերում աշխատող մարդկանց ուղղությամբ։

«Համարյա ամեն օր էլ՝ ժամը 10-ի կողմերը, հենց մարդիկ մտնում են այգի, սկսում են կրակել։ Շարժ նկատելուն պես կրակում են․ ամեն կերպ ուզում են խանգարած լինել, թույլ չտալ, որ մարդիկ աշխատեն։ Որ հեռվից են լինում կրակոցները, գյուղացիները բանի տեղ չեն դնում, շարունակում են աշխատել, բայց որ մոտիկից է լինում, ստիպված դուրս են գալիս այգուց։ Երեկ, օրինակ, «Ղուրուսու» կոչվող տեղամասի խաղողայգիներում սրսկում էին անում, որ վնասատուրները բերքը չփչացնեն։ Ու էլի կրակել են»,-ասում է քաղաքապետը։
Հովհաննիսյանի խոսքով՝ վերջին շրջանում համարյա առանց խաղաղապահների են աշխատում այգիներում, քանի որ խաղաղապահի ներկայության դեպքում թշնամին ավելի է ագրեսիվանում։

«Խաղաղապահներն իրենց մեքենայով են գալիս։ Էն մեծ «Ուրալ»-ը որ տեսնում են, ավելի շատ են կրակում, դրա համար էլ վերջերս համարյա չենք էլ ասում խաղաղապահներին։ Մի քանի հոգի որ մտնեն այգի, կարող է երբեմն նկատելի էլ չլինեն, բայց որ մեքենան է լինում տարածքում, հնարավոր չի չնկատեն ու կրակ չբացեն»,-նշում է Ճարտարի քաղաքապետը։