Եթե մենք կարողանում ենք դերակատարներին փոխել, ապա բեկում մտցնելու հույս կա. Մետաքսե Հակոբյան

«Աղդամի ճանապարհը չի բացվելու, որովհետև այստեղ զուտ իշխանությունների որոշումով չէ,  միանշանակ ժողովուրդը  մեկ մարդու պես թույլ չի տալու, որ դա տեղի ունենա»,-ԼՈՒՐԵՐ.com-ի հետ զրույցում նման կարծիք հայտնեց Արցախի Ազգային ժողովի պատգամավոր Մետաքսե Հակոբյանը՝ անդրադառնալով Ադրբեջանի նախագահի օգնական Հիքմեթ Հաջիևի այն հայտարարությանը, որ երբ բացվի Աղդամի ճանապարհը, 24 ժամվա ընթացքում կբացվի նաև Լաչինը։  
 
«Եթե նման բան տեղի ունենա, ապա Լաչինի միջանցք հասկացությունը կվերանա և ընդըանրապես ռուս խաղաղապահների լինելը կասկածի տակ կդրվի։ Դա նաև մեծագույն ծուղակ կլինի Արցախի համար և հաջորդ քայլով կարող են հայտարարել, որ վերջ ինտեգրումը սկսված է ինչը Արցախի վերջն է ուղղակի, բայց մենք  թույլ չենք տալու, որ դա տեղի ունենա»,- ասաց նա:

Հակոբյանի խոսքով` մեր ամբողջ խնդիրը ՀՀ վարչապետի և ԱՀ նախագահի մեջ էր. «Մեր խնդիրը ըստ էության ներքին է, եթե մենք կարողանում ենք դերակատարներին փոխել, ապա բեկում մտցնելու հույս կա, ամեն դեպքում Արցախում դա շատերն են գիտակցում։ Այս երկու դերակատարներով անհնար է որևէ դրական կամ ի շահ Արցախի և Հայաստանի լուծում գտնել»,- ասաց նա:  

Հակոբյանի խոսքով` նրանք նոր չէ, որ  Արայիկ Հարությունյանին ճանաչում են․ «Արայիկ Հարությունյանին բոլորը դիտարկում էին ճիշտը չասող նախագահ, որովհետև նա կարող էր խոսել և անել ուղիղ դրա հակառակը, ինչին մենք ականատես ենք եղել իր հրաժարականի վերաբերյալ՝  2023թ ի հունվարին։ Առաջին անգամ հենց ինքը լուրեր տարածեց իր հրաժարականի մասին,  այնուհետև ինչ-որ թատերական ներկայացումներ ցուցադրեց, որից հետո  նորից նա պաշտոնավարեց։ Հիմա,  այն վիճակն է, որ պաշտոնավարումը երկար չստացվեց և հրաժարական տվեց»,-խոսքը եզրափակեց Մետաքսե Հակոբյանը: 

Լիլիթ Զալիբեկյան