Ազատ գյուղի զինվորական կացարանում զոհված 15 զինծառայողների գործով նախաքննությունն ավարտվել է

«Հարգելի՛ բարեկամներ

Ս.թ. օգոստոսի 28-ին Ազատ գյուղի զինվորական կացարանում զոհված 15 զինծառայողների գործով քննիչի կողմից էլեկտրոնային փոստի միջոցով գրություն է ներկայացվել տուժող կողմին, որով հայտնվել է, որ նշված քրեական վարույթով նախաքննությունն ավարտվել է։

Նույն օրը քննիչի կողմից դարձյալ էլեկտրոնային փոստի միջոցով տուժող կողմին է ներկայացվել նախապես նշանակված «Հրդեհատեխնիկական, պայթյունատեխնիկական ու շինարարատեխնիկական» համալիր փորձաքննության եզրակացությունը։

Բացի այդ, ս.թ. օգոստոսի 29-ին սույն գործով քննիչը դարձյալ էլեկտրոնային փոստի միջոցով տուժող կողմին է ներկայացրել քրեական գործի նյութերը, որոնք բաղկացած են 22 հատորից՝ բանավոր կերպով տուժողներին և լիազոր ներկայացուցչին հայտնելով, որ դրանց ծանոթացման նպատակով տրամադրվում է երեք օր։

Ս.թ. օգոստոսի 30-ին զոհված զինծառայողների ծնողները լիազոր ներկայացուցչի հետ հանդիպել են քննիչին՝ պահանջելով տրամադրել ողջամիտ ժամկետ՝ 22 հատոր գործի նյութերին ծանոթանալու և համապատասխան միջնորդություններ ներկայացնելու համար, որը քննիչի կողմից մերժվել է։

Նույն օրը միջնորդություն է ներկայացվել սույն քրեական գործով մինչդատական վարույթի ընթացքում հսկող դատախազին՝ պահանջելով սույն քրեական վարույթով քննիչին հեռացնել տվյալ վարույթին մասնակցելուց՝ քրեական վարույթի ընթացքում օրենքի կոպիտ խախտում թույլ տալու համար։

Այսօր ստացվել է ներկայացված միջնորդությունը մերժելու մասին դատախազի որոշումը՝ միաժամանակ հայտնելով, որ այսօր վերը նշված գործն ուղարկվել է դատարան։

Հարգելի՛ բարեկամներ

Վերը նշված ծավալի քրեական վարույթի նյութերին ծանոթանալու նպատակով ընդամենը 3 օր տրամադրելը, քրեադատավարական նորմերի կոպիտ խախտումներով տուժող կողմի բազմաթիվ միջնորդությունները չքննարկելն ու անհետևանք թողնելը, նշանակված համալիր փորձաքննությունների եզրակացություններին չծանոթացնելը, դրանց վերաբերյալ համապատասխան դիրոքորոշում ներկայացնելու համար ողջամիտ ժամկետ չտրամադրելը տուժող կողմի համոզմամբ վկայում է այն մասին, որ սույն քրեական վարույթով թե՛ քննչական մարմինը, և թե՛ դատախազությունը դրսևորեցին որևէ կերպ չարդարացված շտապողականություն և անհասկանալի շահագրգռվածություն գործը հնարավորինս սեղմ ժամկետներում դատարան ուղարկելու համար՝ կոպտորեն խախտելով ՀՀ օրենսդրության պահանջները, ինչպես նաև տուժողների իրավունքները։

Վերը նշվածը մեկ անգամ ևս վկայում է, որ հնարավոր ամեն ինչ արվեց սույն հանցագործությունը մինչև վերջ չբացահայտելու, մեղավոր անձանց ամբողջ շրջանակը չբացահայտելու, պաշտոնական վարկածը բյուրեղացնելու և հանրությանը հրամցնելու համար։

Տուժող կողմը նախապես հայտարարել էր, որ չի բացառում կրկնակի դատաբժշկական փորձաքննություն անցկացնելու վերաբերյալ միջնորդության ներկայացոման հնարավորությունը, միաժամանակ՝ սպասելով նշանակված «Հրդեհատեխնիկական, պայթյունատեխնիկական ու շինարարատեխնիկական» համալիր փորձաքննության եզրակացությանը, սակայն ակնհայտ է, որ տուժող կողմն ապօրինի կերպով զրկվեց մինչդատական վարույթում իրացնել իր իրավունքները։

Տուժող կողմը պատասխանատու կերպով հայտարարում է, որ սույն գործով ծածկադմբոցի որևէ փորձ, փաստական տվյալների որևէ կեղծման փորձ, և սույն գործի բացահայտման ուղղությամբ որևէ խոչընդոտի, ճշմարտությունը բացահայտելուն դեմ ուղղված որևէ քայլի չի հանդուրժվելու։

Տուժող կողմն իր ուժերի ներածին չափով անելու է առավելագույնը՝ սույն գործի բոլոր ու իրական հանգամանքները բացահայտլու համար։

Զոհված 15 զինծառայողների ծնողներ`



Կարեն Դումիկյան

Ռոբերտ Ավագյան

Կարեն Կևորկով

Նորայր Սարգսյան

Վահագն Համբարչյան

Մհեր Ներսիսյան

Սպարտակ Դավթյան

Դավիթ Մարտիրոսյան

Գաբրիել Կիրակոսյան

Արմինե Գրիգորյան

Շահանե Առաքելյան

Վարդան Աբազյան

Նարինե Կարապետյան

Զալիկ Ղարիբյան

Արտակ Սարյան»։