Վերջույթների երկարացման վիրահատությունն օգնել է տղամարդուն հաղթահարել դեպրեսիան

Վերջույթների երկարացման վիրահատությունը կանադական Տորոնտո քաղաքի բնակչին օգնել է հաղթահարել դեպրեսիան և իրեն երջանիկ զգալ։ Այս մասին հայտնում է Metro-ն։

27-ամյա Դենիել Ֆարբորդն ամբողջ կյանքում տառապել է ցածր հասակի պատճառով։ Նա դադարել է աճել 14 տարեկանից, և դա էական ազդեցություն է ունեցել նրա հոգեկան վիճակի վրա։ Ենթագիտակցաբար կանադացին առնականությունը կապում էր բարձրահասակ լինելու հետ և պատրաստ էր զոհաբերել ժամանակն ու գումարը՝ ավելի բարձրահասակ դառնալու համար:

Ֆարբորդը մեկնել է այլ երկիր՝ ոտքի երկարացման վիրահատության։ Պրոցեդուրան, որը նրան սպասում էր, ներառում էր ազդրի կոտրվածք և ձողերի ու արտաքին ֆիքսատորների տեղադրում: Ոսկորները երկարացնելու համար տղամարդը չորս ամիս շարունակ ամեն օր հատուկ բանալիով պտտում էր ֆիքսատորները։ Ոսկրերի հաջող միաձուլումից և ֆիքսատորները հեռացնելու երկրորդ վիրահատությունից հետո նրա հասակը ավելացել է ութ սանտիմետրով՝ 1,7-ից հասնելով 1,78 մետրի։

Ֆարբորդը կիսվել է իր փորձով սոցիալական ցանցերում՝ ոգեշնչելու այլ տղամարդկանց, ովքեր նույնպես բարդույթներ ունեն իրենց հասակի հետ կապված: Նրա խոսքով, վիրահատությունն ու վերականգնումը բարդ են եղել, բայց վստահ է, որ դրանք փոխել են իր կյանքը դեպի լավը։ Այժմ Ֆարբորդն իրեն շատ ավելի երջանիկ և ինքնավստահ է զգում։