Հայաստանն այժմ Հյուսիս-Հարավ միջանցքի մաս չէ, քանի որ վերջնական դիրքորոշում չունի Մեղրիով ճանապարհի մասին. Օվերչուկ

ՌԴ փոխվարչապետ Ալեքսեյ Օվերչուկը մեկնաբանել է Ադրբեջանի և Իրանի միջև իրանական տարածքով երկաթուղու կառուցման նախագիծը, որը շրջանցելու է Հայաստանը։

«Ինչ վերաբերում է Հյուսիս-Հարավին, ապա այստեղ փոխգործակցությունը միանգամայն նորմալ է, բացի այդ, դուք գիտեք, որ Ադրբեջանն ու Իրանը փաստացի արդեն սկսել են մայրուղու կառուցումը, որը կանցնի Արաքս գետի հարավային ափով՝ շրջանցելով Հայաստանը, և փաստացի ստորագրել են Իրանի տարածքով երկաթուղու կառուցման մասին հուշագիր, որը, շրջանցելով Հայաստանը, պարզապես կանցնի գետի մյուս ափով»,- լրագրողներին ասել է Օվերչուկը։

Նա նշել է, որ Հայաստանը շրջանցող Իրանի տարածքով Նախիջևան տանող ճանապարհ կառուցելու տարբերակը՝ Թուրքիայի հետ սահմանային ելքով, երկարությամբ փոքր-ինչ տարբերվում է «Զանգեզուրով» անցնող ճանապարհից։ «Գնահատվում էր, որ Հայաստանի տարածքով երկաթգիծը կլինի 42 կմ, որքան գիտեմ, Իրանի տարածքով երկաթգիծը մոտավորապես 50 կմ է, սա է ամբողջ տարբերությունը», - ասել է Օվերչուկը:

Նա նաև մեկնաբանել է Մեղրիով ճանապարհի կառուցման միջոցով «Հյուսիս-Հարավ» ծրագրին Հայաստանի մասնակցության հարցը։ «Զանգեզուրի» հատվածը, որպես նախագծի մաս, ըստ Օվերչուկի, ներկայումս չի դիտարկվում Հայաստանի կողմից հստակ դիրքորոշման բացակայության պատճառով:

«Հայաստանն այժմ Հյուսիս-Հարավ միջանցքի մաս չէ, մինչ այժմ վերջնական դիրքորոշում չեն ձևավորել Մեղրիով ծրագրված ճանապարհի վերաբերյալ»,- ասել է նա։