Ներկայացում` նվիրված «Աղետների ռիսկերի նվազեցմանը»

Հոկտեմբերի 25-ին Գեղարքունիքի մարզի Գավառ քաղաքի Լևոն Քալանթարի անվան պետական դրամատիկական թատրոնում ներկայացվեց «Կարմիր գլխարկի արկածները» հեքիաթ-պիեսի անդրանիկ ներկայացումը։

 

Ներկայացումը նվիրված էր «Աղետների ռիսկերի նվազեցմանը»:

Բեմադրությունն իրականացվեց ՀՀ ՆԳՆ Փրկարար ծառայության Գեղարքունիքի մարզային փրկարարական վարչության նախաձեռնությամբ՝ ՀՀ Գեղարքունիքի մարզպետարանի և «Ամքոր Հայաստան» բարեգործական հիմնադրամի ֆինանսական աջակցությամբ։

 

Ներկայացմանը ներկա էին բազմաթիվ հյուրեր, այդ թվում՝ ներկայացուցիչներ մարզպետարանից, Գեղարքունիքի մարզային փրկարարական վարչությունից, Ճգնաժամային կառավարման պետական ակադեմիայից, բարեգործական հիմնադրամից, Գեղարքունիքի հոգևոր թեմից և այլն։

 

Թատրոնի դերասանների մասնակցությամբ ընտրված ուսուցման այս տարբերակը աղետների ռիսկերը նվազեցնելու, աղետներին ճիշտ արձագանքելու յուրօրինակ դասընթաց էր, որը տևեց շուրջ 50 րոպե: Հեքիաթ-պիեսը հնարավորություն տվեց նախադպրոցական և տարրական դասարանների երեխաներին ավելի մատչելի և ըմբռնելի կերպով յուրացնել տարաբնույթ արտակարգ իրավիճակներում գործելու վարքականոնները և այն առաջնային անհրաժեշտությունները, որոնք պետք են աղետներին դիմակայելու համար, ինչու չէ, նաև հետագայում իրենց ընկերներին փոխանցելու նպատակով։

 

Հանրային իրազեկման միջոցառումների շրջանակներում բեմադրված այս անդրանիկ ներկայացմամբ ծրագիրը չի սահմանափակվելու: Այն կկրի շարունակական բնույթ, քանի որ արդեն մոտ 2000 շահառու դիմել է աղետների ռիսկերի նվազեցմանն ուղղված ուսուցողական հեքիաթ-պիեսը դիտելու համար։

 

Ավարտին հյուրերը հանդես եկան ելույթներով և իրենց դրական գնահատականը տվեցին այս նախաձեռնությանը՝ հույս հայտնելով, որ նմանատիպ միջոցառումները, որոնք միտված են բարձրացնելու հանրային իրազեկումը հատկապես նախադպրոցականների շրջանում, դուրս կգան Գեղարքունիքի մարզի սահմաններից։