«Եթե Ադրբեջանը շարունակեց լսել փայատերին, ապա լուրջ խնդիրներ է ունենալու Արևմուտքում»․ Էդմոն Մարուքյան

44-օրյա պատերազմի հաղթանակը չի պատկանում միայն Ադրբեջանին, այդ հաղթանակն ունի փայատերեր։ Այս մասին Հանրային հեռուստաընկերությանը տված հարցազրույցում ասել է ՀՀ հատուկ հանձնարարությունններով դեսպան Էդմոն Մարուքյանը։

«Այդ փայատերն սկսել է ուզել իր փայը, հիմա այդ փայը «Զանգեզուրի միջանցքն» է, եւ հիմա Ադրբեջանը պետք է որոշի՝ կամ ինքը պատմական այս շրջանում քայլ է կատարում եւ ձերբազատվում է այդ իրավիճակից, գնում է խաղաղության, կամ եթե շարունակեց լսել այդ փայատերին, ապա նա լուրջ խնդիրներ է ունենալու Արեւմուտքում։ Այստեղ մենք մեծ անելիքներ ունենք, որպեսզի նա իրապես այդ լուրջ խնդիրներն ունենա։ Նրանք որոշակի իմաստով «պաուզա» են պահում, ուզում են մարսել, տեսնեն՝ ինչ կլինի»,- նշել է Էդմոն Մարուքյանը։

Անդրադառնալով ԱՄՆ պետքարտուղարի Եվրոպայի եւ Եվրասիայի հարցերով օգնական Ջեյմս Օ՛Բրայենի հայտարարությանը, Մարուքյանը կարեւոր է այն եւ նշել․ «Միտքը հետեւյալն է, որ Ադրբեջանի խոստումներից հետո թույլ տրված այդ խոստումների խախտումները բերել է նրան, որ ԱՄՆ-ն այլեւս Ադրբեջանի հետ այս իրավիճակում չի շարունակելու այնպես, ինչպես կա»։

Անդրադառնալով ԱՄՆ պետքարտուղարի օգնականի այն հայտարարությանը, որ առաջիկա շաբաթները վճռորոշ են լինելու հայ - ադրբեջանական բանակցությունների համար, Մարուքյանն ասել է․

«Այդ հայտարարությունները երբ արվում էին, դեռեւս չէր չեղարկվել պաշտոնապես հանդիպումը, այսինքն՝ Ադրբեջանին ուղերձ տրվեց, որ եթե դուք գաք այս բանակցություններին եւ դրանք արդյունավետ լինեն, ապա կշարունակվի, 2 շաբաթվա իմաստը դա էր, քանի որ եղավ հետո մերժումը, հետո Սենատի քվեարկությունը,  հույս ունեմ, որ Ներկայացուցիչների պալատում էլ տեղի կունենա այդ քվեարկությունը եւ կհաստատվի այդ բանաձեւը, դրանք կլինեն ուղիղ ուղերձներ Ադրբեջանին։ Ադրբեջանի արձագանքն ԱՄՆ-ին ցույց էր տալիս այն, որ դուք տարածաշրջանի պետություն չեք, եւ տարածաշրջանի պետությունները պետք է այստեղ որոշեն»։