Պուտինն ու Փաշինյանը ԵԱՏՄ և ԱՊՀ գագաթնաժողովների շրջանակում շփվելու հիանալի հնարավորություն կունենան. Պեսկով

ՌԴ նախագահ Վլադիմիր Պուտինը կկարողանա շփվել Հայաստանի վարչապետ Նիկոլ Փաշինյանի հետ ԱՊՀ ոչ պաշտոնական գագաթնաժողովի և Սանկտ Պետերբուրգում Եվրասիական բարձրագույն տնտեսական խորհրդի նիստի շրջանակներում։ Այս մասին ասել է ՌԴ նախագահի մամուլի քարտուղար Դմիտրի Պեսկովը, գրում է Interfax-ը։

«Նրանք հիանալի հնարավորություն կունենան շփվելու առաջիկա իրադարձությունների շրջանակներում»,- ճեպազրույցում ասել է Պեսկովը։

ԵԱՏՄ-ի պետությունների ղեկավարների հանդիպմանը կամփոփվեն ասոցիացիայում Ռուսաստանի նախագահության արդյունքները և կքննարկվեն ինտեգրացիոն գործընթացների խոստումնալից ուղղությունները։ Գագաթնաժողովի արդյունքում նախատեսվում է ընդունել մի շարք փաստաթղթեր, այդ թվում՝ մինչև 2030 թվականը Եվրասիական տնտեսական միության հետագա զարգացման և մինչև 2045 թվականն ընկած ժամանակահատվածի մասին հռչակագիր։

Պետությունների ղեկավարների հանդիպման շրջանակում ԵԱՏՄ երկրների և Իրանի միջև ազատ առևտրի գոտու մասին համաձայնագիր կստորագրվի։

«Նույն նիստում ԵԱՏՄ նախագահությունը կանցնի Հայաստանին։ Նիկոլ Փաշինյանը նախապես չի հայտնել՝ մասնակցելո՞ւ է արդյոք Սանկտ Պետերբուրգի իրադարձություններին։ Հայկական կողմը չի մասնակցել նոյեմբերին Մինսկում կայացած ՀԱՊԿ գագաթնաժողովին։ ՌԴ նախագահի օգնական Յուրի Ուշակովը հույս է հայտնել, որ Հայաստանի ներկայացուցիչները կգան Սանկտ Պետերբուրգ՝ «Պուտինից վերցնելու էստաֆետը (ԵԱՏՄ նախագահությունը)»,-գրում է պարբերականը։

ԵԱՏՄ գագաթնաժողովը կվերածվի ԱՊՀ անդամ պետությունների ղեկավարների ոչ պաշտոնական հանդիպման, որը ՌԴ նախագահը ավանդաբար հրավիրում է տարեվերջին։