Հայաստանը որոշել է փոփոխություններ կատարել իր արտաքին քաղաքականության մեջ․ ՆԱՏՕ-ի ներկայացուցիչ
Հայաստանը վճռական որոշում է կայացրել՝ փոփոխություններ կատարել իր արտաքին քաղաքականության մեջ, մասնավորապես՝ Մոսկվայից որոշակի առումով հեռավորություն պահելու մասով։ Այս մասին վրացական «Առաջին ալիք» հեռուստաալիքին տված հարցազրույցում ասել է Կովկասում և Կենտրոնական Ասիայում ՆԱՏՕ-ի Գլխավոր քարտուղարի հատուկ ներկայացուցիչ Խավիեր Կոլոմինան։
«Իմ կարծիքով, Հայաստանն արդեն սկսել է մերձենալ մեզ հետ։ Նրանք խնդրում են էլ ավելի շատ համագործակցություն, ավելի շատ քաղաքական երկխոսություն, ՆԱՏՕ-ի ներկայացուցչության ավելացում մեր հարաբերություններում: Մենք ողջունում ենք մեր գործընկերների որոշումները»,- ասել է նա:
Բաքվի և Երևանի միջև խաղաղության պայմանագրի վերաբերյալ Կոլոմինան նշել է, որ ՆԱՏՕ-ն լավատեսորեն է տրամադրված։ Նա հիշեցրել է, որ Սկոպյեում առանձին հանդիպումներ է ունեցել Հայաստանի և Ադրբեջանի արտգործնախարարությունների ղեկավարների հետ։
«Մենք ամեն կերպ աջակցել ենք Հայաստանի և Ադրբեջանի հարաբերությունների կարգավորմանը, դրա ջանքերին, որոնք ներդնում են Եվրամիությունը կամ ԱՄՆ-նն, և այն ջանքերին, որոնք ձեռնարկվել են Հայաստանի և Ադրբեջանի կողմից՝ երկկողմ հիմունքներով»,– ասել է նա։
ՈՒՂԻՂ ԵԹԵՐ
Ամենադիտված 
Մահացել է բժիշկ Տիգրան Վարդանյանը
