Եթե Հայաստանը ցանկանում է տնտեսապես «մեռնել», ապա կարող ենք նրան կորցնել․ Լուկաշենկո

Բելառուսի նախագահ Ալեքսանդր Լուկաշենկոն, Սանկտ Պետերբուրգում պատասխանելով լրագրողների հարցերին, ասել է, որ ոխ չի պահում ՀՀ վարչապետ Նիկոլ Փաշինյանի դեմ և վստահ է, որ այս երկիրը հավատարիմ կմնա իր ներկայիս դաշնակիցների հետ համագործակցությանը, հաղորդում է ԲԵԼՏԱ-ի թղթակիցը։

Լուկաշենկոյին հարցրել են՝ դժգոհություն կա՞, որ Նիկոլ Փաշինյանը եկել է Սանկտ Պետերբուրգ՝ ԵԱՏՄ գագաթնաժողովին, սակայն նախկինում չի մասնակցել Մինսկում ՀԱՊԿ գագաթնաժողովին։

«Ի՞նչ եք խոսում։ Դրանք տարբեր ձևաչափեր են: Ես գիտեի դրա մասին: Ես այն ժամանակ էլ ասում էի, որ նա թռչելու է Սանկտ Պետերբուրգ: Երբ խոսեցի նրա հետ, ասացի. «Նիկոլ Վովաևիչ, Սանկտ Պետերբուրգ կգաք, չէ՞: Նա ասում է. «Դե, դա այլ ձևաչափ է՝ տնտեսական։ Մենք վիրավորված ենք ռազմաքաղաքականից՝ ՀԱՊԿ-ից, իսկ դա տնտեսական է»: Ուստի գիտեի, որ նա թռչելու է Սանկտ Պետերբուրգ: Եվ դրանում սատարեցի նրան այն ժամանակ, սատարում եմ և հիմա: Ի՞նչ վիրավորանք կա այստեղ», - ասել է Բելառուսի նախագահը։

Լրագրողները հարցրել են՝ «Չե՞նք կորցնում Հայաստանին մեր ընկերների շարքից»։

Ալեքսանդր Լուկաշենկոն պատասխանել է. «Եթե Հայաստանը ցանկանում է տնտեսապես «մեռնել», ապա կարող ենք նրան կորցնել: Բայց չեմ կարծում, որ հայերը հիմար մարդիկ են, նրանք խելացի մարդիկ են: Այնպես որ, ոչ, ես դրա մասին չեմ էլ մտածում: Ես վստահ եմ, որ Հայաստանը ոչ մի տեղ չի գնա»,– ասել է նա՝ բերելով  Աֆղանստանի օրինակը և նշելով․ «Հենց այդպես էլ կօգտագործեն Հայաստանը ու կլքեն»:

«Ո՞վ նրանց այնտեղ կօգնի։ Այնտեղ Եվրոպան, Ֆրանսիան ինչ-որ բան են փորձում անել։ Տեսնում եք, թե ինչ է կատարվում Ֆրանսիայում։ Թող իրենք՝ ֆրանսիացիներն, իրենց մոտ կարգի բերեն, հետո մտնեն Կովկաս»,- ասել է Բելառուսի ղեկավարը։