«Հայաստանի հետ քննարկում ենք 8 գյուղերի վերադարձի հարցը». Բայրամով

Զարմանալի և ցավալի է, որ Հայաստանում «արևմտյան ադրբեջանցիների վերադարձն իրենց հողեր» ընկալվում է որպես տարածքային պահանջ։ Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը, հայտնում է ադրբեջանական ԱՊԱ գործակալությունը։

«Նույնիսկ վարչապետն ասաց, որ սա Հայաստանի համար ազգային անվտանգության սպառնալիք է համարում։ Ես կարծում եմ, որ եթե հայկական կողմը, ինչպես և Ադրբեջանը, ցուցաբերի մարդկային դիրքորոշում, ապա կարելի է դրական արդյունքների հասնել»,- ասել է Բայրամովը։

Նա նաև հայտարարել է, թե բանակցություններ են ընթանում Հայաստանի վերահսկողության տակ գտնվող 8 գյուղերի վերաբերյալ։ Բայրամովը նշել է, որ պաշտոնական Երեւանն այս հարցում որոշակի պահանջներ ունի. «Խոսքը կոնկրետ բնակավայրերի մասին է։ Ոչ ոք կասկած չունի, թե ում են պատկանում այս բնակավայրերը։ Մեր դիրքորոշումն արդար է»։