Կինն սկսել է օրական 100 անգամ հորանջել և իմացել իր անբուժելի հիվանդության մասին

Մեծ Բրիտանիայի բնակչուհին բողոքել է հաճախակի հորանջելուց և իմացել հազվագյուտ անբուժելի հիվանդության մասին, հայտնում է Liverpool Echo-ն։

47-ամյա Նիկի Դևիսը ասել է, որ իր մոտ նկատել է տարօրինակ ախտանիշներ, որոնք ի հայտ են եկել 2022 թվականի հունվարին COVID-19-ով հիվանդանալուց հետո: Կնոջ խոսքով՝ ինքը հանկարծ սկսել է օրական մոտ 100 անգամ հորանջել։

Անհանգստացած բրիտանուհին դիմել է թերապևտին, ով ենթադրել է, որ նրա մոտ կարող է լինել Քնի օբստրուկտիվ ապնոէի համախտանիշ: Բժիշկը հիվանդին ուղղորդել է քիթ-կոկորդ-ականջաբանի մոտ, որն իր հերթին հայտարարել է, որ հաճախակի հորանջելու պատճառը կարող է լինել ալերգիան։ Բժիշկները երկար ժամանակ չէին կարողանում բրիտանուհուն ճիշտ ախտորոշում տալ։ Այնուամենայնիվ, հետագա հետազոտություններից հետո նրանք պարզել են, որ Դևիսի մոտ շարժիչ նեյրոնի հիվանդություն է։

Չնայած առողջական լուրջ խնդիրներին՝ Դևիսն ասում է, որ դրանք իրեն ավելի դրական և ուժեղ մարդ են դարձրել: «Ինձ սխալ մի հասկացեք, դեռ պահեր են լինում, երբ կարող եմ որոշ ժամանակ լաց լինել: Բայց հետո նորից հավաքվում եմ ինձ։ Ես չեմ ուզում հոռետես լինել, ուստի երկար ժամանակ է՝ չեմ անհանգստանում», - ասել է նա: