Հայաստանում Ռուսաստանի ռազմական ներկայության քննարկումը վնասակար է. Գալուզին

Հայաստանում ռուսական ռազմական ներկայության քննարկումն անտեղի է և վնասակար, «ՌԻԱ Նովոստի»-ին տված հարցազրույցում ասել է ՌԴ փոխարտգործնախարար Միխայիլ Գալուզինը։

Խոսելով Հայաստանում ռուսական ռազմաբազայի թեմայի մասին՝ նա հիշեցրել է, որ «դրա տեղակայման մասին պայմանագիրը կնքվել է 1995 թվականի մարտի 16-ին՝ ելնելով երկու պետությունների ազգային շահերից»։ «Այս փաստաթղթի 26-րդ հոդվածի համաձայն՝ մեր զինվորականների գտնվելու ժամկետը 49 տարի է, որից հետո համաձայնագիրը ավտոմատ կերպով երկարաձգվում է հինգ տարով»,- նշել է դիվանագետը։

Գալուզինի խոսքով՝ «ռուս զինվորներն ու սպաները շարունակում են արդյունավետորեն ապահովել խաղաղությունն ու անվտանգությունը ոչ միայն Հայաստանում, այլ նաև կայունությունը ողջ Հարավային Կովկասում»։

«Հանրապետությունում մեր ռազմական ներկայության վերաբերյալ ցանկացած քննարկում մենք համարում ենք վնասակար և անտեղի»,- եզրափակել է նա։