«Սա մեր պատմության ավարտը չէ, պարտավոր ենք վերականգնել արժանապատվությունը»․ Արտակ Բեգլարյան

 Արցախի նախկին պետնախարար Արտակ Բեգլարյանի Ամանորյա ուղերձը․

«Սիրելի՛ Հայրենակիցներ,

Այս տարին ամփոփելիս բոլորս մտաբերում ենք առաջնահերթորեն արյուն, կորուստ, արտասուք, ազգային մեծագույն ողբերգություն, խարան, քանի որ կորցրել ենք մեր հինավուրց և սրբազան Հայրենիքը, մեր արժանապատվությունն ու արժեհամակարգի հենասյունը: Իրականում անհնար է բառերով նկարագրել այն ցավը, որն ապրել ու ապրում են արցախահայությունը և Արցախի բացառիկ արժեքը գիտակցող հայերը:

Մյուս կողմից, սա մեր պատմության ավարտը չէ, և կյանքը շարունակվում է՝ իր մարտահրավերներով ու հնարավորություններով հանդերձ: Ուստի, մենք պարտավոր ենք գալիք տարին և տարիներն օգտագործել արդյունավետ կերպով՝ վերականգնելու մեր արժանապատվությունն ու անդորրը, փայփայելու Հայոց Հայրենիքի մնացյալ մասը և արժանապատիվ կերպով վերադառնալու Արցախ: Այդ նպատակը ենթադրում է ազգային գաղափարախոսություն ու համախմբում, արդյունավետ կառավարում ու հզոր Հայոց Պետականություն:

Թո՛ղ 2024 թվականը բերի արժեհամակարգային հարություն և երկարաժամկետ պայքարի ոգի մեր ժողովրդի համար, իսկ յուրաքանչյուր հայի օջախին՝ երջանկություն, ներդաշնակություն ու խաղաղություն: Թո՛ղ կորչեն անցնող տարվա մեղքերը, զրկանքներն ու դժբախտությունները:

Շնորհակալություն Հայրենիքի ու մեր բոլորիս արժանապատվության պաշտպանության գործում այս տարի ևս ներդրում ունեցած անձանց՝ զոհված թե ողջ: Հատուկ խոնարհումս բոլոր ժամանակների զոհվածների հարազատներին և այժմ Հայոց Հայրենիքի սահմանները հսկող պաշտպաններին: Ներողություն բոլոր հայրենակիցներիս իմ բաժին բացթողումների համար:

Սրտանց ու ամուր գրկում եմ բոլոր նրանց, ովքեր գիտակցում են Արցախի արժեքը, խորապես ցավում են մեր կորուստների համար և զգում են պատասխանատվություն Մայր Հայաստանը փայփայելու և Արցախը վերադարձնելու ապագա պայքարի մեջ: Իսկ Արցախի էջը փակելու ցանկություն ունեցող անձինք կա՛մ դարձի կգան, կա՛մ մեկ օր կառերեսվեն Ժողովրդի ու Աստծո արդար դատաստանին:

Անկախ բոլոր հանգամանքներից՝ շնորհավոր Ամանոր ու Սուրբ Ծնունդ:

Բոլորիս միահամուռ հավատքով ու ջանքով՝ մենք մեկ օր անվտանգ ու արժանապատիվ կերպով տոնելու ենք այս տոները կրկին Արցախում, վերագտնելու ենք մեր սրտերն ու հոգիներն այնտեղ»։