Եկեք ֆիքսենք, որ սա այլ կոնտեքստ չունի․ Պապոյանը՝ Ուկրաինայի տարածքային ամբողջականությունը պաշտպանելու մասին

«2020 թվականի նոյեմբերի 9-ի հայտարարության մեջ այն, ինչ ՀՀ-ին է վերաբերվել, Հայաստանը բոլոր իր պարտավորությունները կատարել է, բայց ցավոք սրտի, ինչ վերաբերում է Ադրբեջանին և Ռուսաստանին, ոչինչ չի կատարվել կամ ինչ-որ մի շրջան կատարվել է, բայց հիմա, մեծ հաշվով, կատարված չէ։ Հետևաբար մեզ համար շատ տարօրինակ է, երբ իրենք են խոսում նոյեմբերի 9-ի համաձայնագրի մասին, երբ իրենք համաձայնագրի բոլոր կետերը խախտել են»,- այս մասին այսօր ԱԺ-ում լրագրողների հետ զրույցում ասել է ՔՊ-ական պատգամավոր Գևորգ Պապոյանը՝ անդրադառնալով նախօրեին ՀՀ վարչապետ Նիկոլ Փաշինյանի խոսքերին, ըստ որոնց՝ Ռուսաստանն ու Ադրբեջանը պատռել, գցել են մի կողմ նոյեմբերի 9-ի հայտարարությունը։

Պապոյանը մեկնաբանեց նաև Փաշինյանի այն հայտարարությունը, որ Հայաստանը պաշտպանում է Ուկրաինայի տարածքային ամբողջականությունը․

«Տարածքային ամբողջականություն պաշտպանելը դա Ուկրաինայի համար չի, Հայաստանի համար է։ Եթե մեկի տարածքային ամբողջականությունը կասկածի տակ ես դնում, դա նշանակում է՝ շատ լեգիտիմ է, երբ որ երրորդն էլ քո տարածքային ամբողջականությունն է կասկածի տակ դնում։ Սա Ռուսաստանի դեմ չէ՛, սա Ուկրաինայի կողմ չէ՛, սա Հայաստանի համար է։ Եկեք ֆիքսենք, որ սա այլ կոնտեքստ չէր էլ կարող ունենալ»,- պատասխանել է պատգամավորը։