Փաշինյանն ի զորու չէ պաշտպանել ՀՀ շահերը, ուզում եք՝ բանակցությունների սեղանը տարեք, լուսնի վրա դրեք․ Արթուր Խաչատրյան

Այսօր Ազգային ժողովում ընդդիմադիր պատգամավոր Արթուր Խաչատրյանը պատասխանել է լրագրողների հարցերին։ Մասնավորապես նա անդրադարձ է կատարել Մյունխենում՝ Գերմանիայի միջնորդությամբ կայացած Փաշինյան-Ալիև հանդիպմանը․

«Նախ նույն օրինաչափությունն է, ինչ-որ 2018-2020 թվականներին․ երբ ադրբեջանական աղբյուրները նշում էին, որ Ալիևը հանդիպել է Փաշինյանի հետ, Փաշինյանի ո՛չ պաշտոնական կայքը, ո՛չ ընտանեկան կայքը դրանց մասին չէին խոսում։

Մենք տեսնում ենք, որ տեղի է ունենում բանակցությունների ֆորմատի փոփոխություն, եթե իհարկե բանակցություններ կան․ Գերմանիան և Թուրքիան սերտ համագործակցում են, և ես չգիտեմ՝ ինչ կարող է Հայաստանին տալ գերմանական միջնորդությունը»,- նշել է պատգամավորը և իր խոսքը շարունակելով շեշտել՝ ի տարբերություն Փաշինյանի Ալիևը բոլոր հարթակներում, բոլոր կողմերից կարողանում է ստանալ այն, ինչ իրեն պետք է, իսկ Փաշինյանն ամեն տեղ պարտվում է․

«Անկախ նրանից, թե բանակցությունների սեղանը որտեղ է դրված, եթե պետության ղեկավարը ի զորու չէ պաշտպանել երկրի շահերը, ուզում եք՝ բանակցությունների սեղանը տարեք, լուսնի վրա դրեք․․․ այն, որ Փաշինյանն աշխատում է այս պետության դեմ՝ կասկածի տեղիք չի թողնում»,- ՀՀ ներկայիս իշխանությունների վարած արտաքին քաղաքականության վերաբերյալ իր խոսքն ավարտեց Խաչատրյանը։