Ի՞նչ սպասել Ռուբինյան-Քըլըչ հանդիպումից․ սահմանը կբացվի՞.  MediaHub

 MediaHub-ը գրում է.

Քիչ առաջ ՀՀ ԱԳՆ-ն հաղորդագրություն տարածեց՝ նշելով, որ վաղը տեղի կունենա Հայաստանի և Թուրքիայի ներկայացուցիչների 5-րդ հանդիպումը:

ԱԳՆ հաղորդագրության համաձայն՝ Ռուբինյանն ու Քըլըչը կհանդիպեն հայ-թուրքական սահմանին։

Ի՞նչ սպասել այդ հանդիպումից, արդյո՞ք հնարավոր է այս հանդիպումից հետո բացվի հայ-թուրքական սահմանը․ MediaHub-ը փորձեց պարզել՝ զրուցելով ԱԺ «Հայաստան» խմբակցության պատգամավոր Արթուր Խաչատրյանի հետ։

Նրա խոսքով՝ ոչ մի լավ բան պետք չէ սպասել այս հանդիպումից, ինչպես օրինակ, պետք չէ լավ բան սպասել Փաշինյան-Ալիև հանդիպումներից։

«Ի սկզբանե պայմանավորվածությունը եղել է այն մասով, որ սահմանը բացվելու է երրորդ երկրների ներկայացուցիչների և դիվանագիտական անձնագիր ունեցողների համար։ Այսինքն՝ դա որևէ կերպ չի ենթադրում Հայաստանի բլոկադայի վերացում»,- նշեց պատգամավորը։

Արթուր Խաչատրյանը ևս մեկ անգամ հստակեցրեց՝ որևէ լավ բան պետք չէ սպասել այս հանդիպումից։ «Թուրքերն էլի ինչ-որ լրացուցիչ պահանջներ են ներկայացնելու։ Պետք է հստակ գիտակցել, որ Թուրքիան Հայաստանի հետ հարաբերությունները դիտարկում է Հայաստան-Ադրբեջան հարաբերությունների համատեքստում»,- նշեց նա։

Ըստ պատգամավորի՝ երբ Հայաստանը գնա միակողմանի զիջումների, Թուրքիան սահմանը կբացի։ Բայց դա էլ հստակ չէ, թե ուր կհասնի այդ զիջումների պահանջը, քանի որ Ադրբեջանի ախորժակն օր օրի մեծանում է։

Նարե Գնունի