Բլինկենը ժամանել է Իսրայել՝ նպաստելու հրադադարին

ԱՄՆ պետքարտուղար Էնթոնի Բլինկենը ժամանել է Իսրայել՝ հրադադարի և Գազայի հատվածում պատանդների ազատ արձակման շուրջ առաջիկա բանակցություններին ընդառաջ։ Ամերիկյան դիվանագիտության ղեկավարը վայրէջք է կատարել Թել Ավիվի Բեն Գուրիոն օդանավակայանում կիրակի օրը՝ օգոստոսի 18-ին, հայտնում է AFP-ն։

Ըստ պարբերականի՝ օգոստոսի 19-ին Բլինկենը կհանդիպի Իսրայելի վարչապետ Բենիամին Նեթանյահուի, պաշտպանության նախարար Յոավ Գալանտի և նախագահ Իսահակ Հերցոգի հետ, իսկ օգոստոսի 20-ին կմեկնի Եգիպտոս։

Պետքարտուղարության փոխխոսնակ Վեդանտ Պատելը պարզաբանել է, որ Բլինկենի «ինտենսիվ դիվանագիտական ​​ջանքերը» կհիմնվեն օգոստոսի 16-ին Վաշինգտոնի կողմից Եգիպտոսի և Քաթարի աջակցությամբ ներկայացված միջանկյալ առաջարկի վրա։

«Այս առաջարկը մեզ թույլ կտա Գազայում հասնել հրադադարի, ազատել բոլոր պատանդներին, ապահովել մարդասիրական օգնության բաշխումը ողջ գոտում և պայմաններ ստեղծել ավելի լայն տարածաշրջանային կայունության համար», - վստահեցնում է Պետդեպարտամենտը:

Բլինկենը ևս մեկ անգամ կոչ կանի տարածաշրջանի բոլոր երկրներին խուսափել էսկալացիայից կամ այլ գործողություններից, որոնք կարող են խաթարել համաձայնության հասնելու հնարավորությունը։

Ինչպես հիշեցրել է AFP-ն, սա ԱՄՆ պետքարտուղարի իններորդ այցն է Մերձավոր Արևելք 2023 թվականի հոկտեմբերին Գազայի հատվածում պատերազմի սկսվելուց ի վեր։