Առողջապահական շատ հիմնարկների շենքեր Տավուշում վատթար վիճակում են, սակայն չեն նորոգում

Առողջապահական շատ հիմնարկների շենքերը վատթար վիճակում են, սակայն չեն նորոգում, նորերը չեն կառուցում, ահազանգում է տավուշեցի լրագրող Ոսկան Սարգսյանը։ 
 

Լրագրողը Տավուշի մարզպետ Հայկ Ղալումյանին հարցում է ուղարկել` մարզի պետական առողջապահական հիմնարկներից քանի՞սն ունեն վերանորոգման կամ հիմնանորոգման կարիք։

 Մարզպետարանից պատասխանել են․ «ՀՀ Տավուշի մարզպետի աշխատակազմի ենթակայության 21 բուժհիմնարկներից (ինչպես նաև նրանց կազմում գործող 39 բուժակամանկաբարձական կետերից) վերանորոգման, հիմնանորոգման և նորի կառուցման կարիք ունեն հետևյալ բուժհիմնարկները և նրանց կազմում գործող բուժակա-մանկաբարձական կետերը.1) Հաղարծինի ԱԱՊԿ ՊՈԱԿ-ի Ներքին Գոշի ԲՄԿ - նորի կառուցման կամ նոր վագոն-տնակի կարիք։ 2) Գետահովիտի ԱԱՊԿ ՊՈԱԿ-ի – նոր շենքի կառուցման կարիք։ 3)Իջևանի ԱԱՊԿ ՊՈԱԿ-ի Լուսաձորի ԲՄԿ - հիմնանորոգման կարիք։ 4) Այգեհովիտի ԱԱՊԿ ՊՈԱԿ-ի Կայանավանի ԲՄԿ - հիմնանորոգման կարիք։ 5) Խաշթառակի ԱԱՊԿ ՊՈԱԿ-ի Լուսահովիտի ԲՄԿ- հիմնանորոգման կարիք։ 6) Սևքարի ԳԲԱ ՊՈԱԿ-ի Աճարկուտի և Սարիգյուղի ԲՄԿ-ներ - հիմնանորոգման կարիք 7) Նավուրի ԱԱՊԿ ՊՈԱԿ-ի Իծաքարի ԲՄԿ - հիմնանորոգման կարիք։8) Նոյեմբերյանի ԲԿ ՓԲԸ-ի մանկական և ինֆեկցիոն բաժանմունքների շենքը կառուցում և Ջուջևանի ԲՄԿ - հիմնանորոգման կարիք: 9) Այրումի ԳԲԱ ՊՈԱԿ - նոր շենքի կառուցման կարիք։ 10) Ոսկեվանի ԳԲԱ ՊՈԱԿ-ի Ոսկեպարի ԲՄԿ - հիմնանորոգման կարիք։ 11)Կողբի ԳԲԱ ՀՈԱԿ - նոր շենքի կառուցման կարիք։ 12)Բագրատաշենի ԳԲԱ ՊՈԱԿ-ի Դեբեդավանի ԲՄԿ - հիմնանորոգման կարիք: 13) Զորականի ԳԲԱ ՊՈԱԿ-ի Հաղթանակի ԲՄԿ - հիմնանորոգման կարիք»: 

Մարզպետ Ղալումյանին նոր հարցում է ուղարկել՝ Տավուշի մարզում ներկայումս առողջապահական քանի՞ հիմնարկությունների շենքեր են կառուցվում, նորոգվում, յուրաքանչյուր դեպքում որքա՞ն է աշխատանքների ֆինանսավորման չափը: 

Մարզպետարանից պատասխանել են․ «ՀՀ Տավուշի մարզպետարանի պատվիրակությամբ ներկա պահին նորոգվող, կառուցվող առողջապահական կազմակերպություններ չկան»։ 

«Պետբյուջեի փողերը փոխանակ ուղղվեն բուժհիմնարկների շենքերի նորոգմանը, հատկացվում են մարզպետարանի պաշտոնյաների պարգևատրման նպատակով։ 2024թ․ հուլիսի 15-ի դրությամբ Տավուշի մարզպետի աշխատակազմի աշխատակիցները ստացել են 33 միլիոն 484 հազար 235 դրամ պարգևավճար»,- գրել է լրագրողը։