Ռուսաստանը պատրաստ է Երևանին և Բաքվին հարթակ տրամադրել երկկողմ ձևաչափով բանակցությունների համար. Զախարովա

Ռուսաստանի Դաշնությունը պատրաստ է իր հարթակը տրամադրել Ադրբեջանի և Հայաստանի ներկայացուցիչների միջև բանակցությունների համար և նրանց համար ստեղծել առավել հարմարավետ պայմաններ։ Այս մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Հայաստանի հետ խաղաղության պայմանագրի վերաբերյալ Ադրբեջանի ղեկավարի հայտարարությունները։
Նրա խոսքով, Ռուսաստանը դեռևս 2022 թվականին ընդգծել է երկրների միջև խաղաղության պայմանագրի կնքման ակտիվ նախապատրաստման կարևորությունը տարածաշրջանում կայուն և երկարաժամկետ խաղաղության հասնելու համար։

«Այսինքն՝ մեր մոտեցումը ոչ միայն կայուն է, այլև արձանագրված է մեր երկրի կողմից ստորագրված փաստաթղթում։ Մենք պատրաստ ենք դա անել ապագայում»,- ասել է Զախարովան։

Նա նշել է, որ Մոսկվան երաշխավորում է երկու պատվիրակությունների աշխատանքի համար առավել հարմարավետ պայմանների ստեղծումը իրենց նախընտրած երկկողմ ձևաչափով։ 

«Մենք մեր դաշնակիցների միջև հավասարակշռված խաղաղության պայմանագրի կնքումը նախապայման ենք համարում տարածաշրջանում անբաժանելի անվտանգության և կայուն տնտեսական զարգացման ճարտարապետություն կառուցելու համար», - ասել է ՌԴ ԱԳՆ պաշտոնական ներկայացուցիչը։

Նա հույս է հայտնել, որ առկա տարաձայնությունները շուտափույթ լուծում կստանան և հաջող առաջընթաց կբերեն հայ-ադրբեջանական հարաբերությունների կարգավորման այլ ոլորտներում՝ ամենաբարձր մակարդակով երկկողմ պայմանավորվածություններին համապատասխան։