Բնակիչները գանգատվում են ջրի համից և հոտից, սակայն արտեզյան ջրերը համարվում են խմելու ենթակա

Aravot.am-ը գրում է․

Նախորդ երկու շաբաթվա ընթացքում իրականացվել է 57 նմուշ խմելու ջրի լաբորատոր հետազոտություն, արդյունքում շեղումներ չեն արձագրվել, իսկ ռեկրեացիոն գոտիների հատվածներից նմուշառված 17 նմուշ ջրի լաբորատոր հետազոտության շեղումների վերաբերյալ գրությամբ տեղյակ է պահվել առողջապահական եւ տեսչական մարմնին:

Այս մասին զեկուցվեց Երեւանի քաղաքապետ Տիգրան Ավինյանին՝ քաղաքապետարանի գործակարգավարական նիստի ժամանակ: Նշվեց նաեւ, որ այդ ժամանակաշրջանում արձանագրվել է աղիքային վարակի 236 դեպք: Տիգրան Ավինյանը հետաքրքրվեց խմելու ջրի լաբորատոր հետազոտության արդյունքներով, քանի որ, նրա խոսքով, այս սեզոնին որոշ վարչական շրջաններում ջրի պակասի պատճառով արտեզյան ջրերի որոշ քանակ են ավելացնում ընդհանուր ծավալի մեջ. «Երբ մենք ասում ենք՝ շեղումներ չեն արձանագրվել, արդյոք այդ դեպքերը նույնպես համարվում են ստանդարտի մեջ»:

Քաղաքապետին զեկուցվեց, որ ստացվում են ահազանգեր բնակիչների կողմից, կատարվում են լրացուցիչ նմուշառումներ, հատկապես բնակիչները գանգատվում են ջրի համից եւ հոտից, սակայն արտեզյան ջրերը համարվում են խմելու ենթակա: «Բայց միանշանակ զգացողություն է առաջացնում, որ դրական փորձառություն չէ այդ ջուրը խմելը… Մեր հիմնական խնդիրներից մեկն է ջրի խնդիրը, եւ ինչ-որ մի փուլից արտեզյան ջրերի խառնուրդը պետք է վերացնենք»,- ասաց Ավինյանը: