Երևանում «Նիվա»-ն բախվել է էլեկտրասյանը, ապա երկաթե ճաղավանդակներին և կողաշրջվել

Այսօր՝ հուլիսի 21-ին, ավտովթար է տեղի ունեցել Երևանում։ Ժամը 02։00-ի սահմաններում Արմավիրի մարզի բնակիչ 47-ամյա Տիտալ Իբոյանը իր վարած «ՎԱԶ 2121» մակնիշի ավտոմեքենայով, դեռևս անհայտ հանգամանքներում Իսակովի պողոտայից դեպի «Կարգո» միջազգային բեռնափոխադրման ընկերություն տանող փողոցի խաչմերուկի հարևանությամբ բախվել է երթևեկության բաժանարար գոտում տեղադրված էլեկտրասյանը, ապա երկաթե ճաղավանդակներին և կողաշրջվել։

Ինչպես հայտնում է ֆոտոլրագրող Գագիկ Շամշյանը, ըստ նախնական տեղեկությունների բարեբախտաբար տուժածներ չկան։ Դեպքի վայր են ժամանել ՀՀ Ներքին գործերի նախարարության փրկարար ծառայության Երևանի թիվ 7-րդ հրշեջ-փրկարարական ջոկատից 1 մարտական հաշվարկ։ Փրկարարները հատուկ տեխնիկայի միջոցով հեռացրել են կոտրված ճաղավանդակները։

Օպերատիվորեն ժամանել են նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 4-րդ գումարտակի պարեկները՝ գումարտակի հրամանատար Արմեն Գասպարյանի, գումարտակի հրամանատարի տեղակալ Կարեն Ավետիսյանի գլխավորությամբ։