Հայտնի է՝ որտեղ տեղի կունենա «3+3» ձևաչափով ԱԳ նախարարների հաջորդ հանդիպումը

ԱԳ նախարարների «3+3» ձևաչափով հաջորդ հանդիպումը տեղի կունենա մոտ ժամանակներս՝ Թուրքիայում։ Այս մասին իրանական SNN գործակալությանը հայտնել է Հայաստանում Իրանի դեսպան Մեհդի Սոբհանին։

Նա հիշեցրել է, որ հարթակին մասնակցող արտգործնախարարների վերջին հանդիպումն առաջին անգամ տեղի է ունեցել Թեհրանում։

Դիվանագետը նաև մատնանշել է իրանական կողմի համար Հայաստանի Սյունիքի մարզի անվտանգության կարևորությունը։

«Սա ռազմավարական տարածաշրջան է, որը կարևոր դեր է խաղում Իրանի և Հայաստանի միջև անվտանգության և առևտրի ապահովման գործում։ Կապանում Իրանի գլխավոր հյուպատոսության բացումը նպաստեց սահմանային հաղորդակցության բարելավմանը», - եզրափակել է նա։

Հիշեցնենք, որ «3+3» խմբի (ըստ էության՝ «հնգյակի», քանի որ Վրաստանը դեռ չի մասնակցում հարթակի աշխատանքներին) առաջին հանդիպումը կայացել է 2021 թվականի դեկտեմբերին Մոսկվայում՝ արտաքին գործերի փոխնախարարի մակարդակով հինգ երկրների՝ Հայաստանի, Ռուսաստանի, Իրանի, Ադրբեջանի և Թուրքիայի նախարարների մասնակցությամբ։

Հինգ երկրների նախարարների մասնակցությամբ ևս մեկ հանդիպում անցկացվել է 2023 թվականի հոկտեմբերին՝ Իրանում։

Հաջորդ հանդիպումը տեղի կունենա Թուրքիայում՝ 2024 թվականին։