Վրաստանի Սահմանադրական դատարանն վարույթ է ընդունել երկրի նախագահի հայցն ընդդեմ «օտարերկրյա գործակալների մասին» օրենքի

News.am- ը գրում է․

Վրաստանի Սահմանադրական դատարանը վարույթ է ընդունել նախագահ Սալոմե Զուրաբիշվիլիի հայցն ընդդեմ «օտարերկրյա գործակալների մասին» օրենքի։ Ըստ NewsGeorgia-ի՝ դրա մասին տեղեկություն է տարածել Սահմանադրական դատարանի մամուլի ծառայությունը։

Զուրաբիշվիլին հուլիսի 15-ին հայց է ներկայացրել՝ պահանջելով չեղյալ համարել օրենքը։ Նրա կարծիքով, դա, մասնավորապես, հակասում է Վրաստանի Սահմանադրության 78-րդ հոդվածին, ըստ որի՝ իշխանության բոլոր թևերը, իրենց իրավասությունների շրջանակում, պետք է ամեն ինչ անեն երկիրը ԵՄ-ին և ՆԱՏՕ-ին ինտեգրելու համար։

Գործով պատասխանողը լինելու է երկրի խորհրդարանը։

Նախկինում լրատվամիջոցները հայտնել էին, որ եթե դատարանը հայցն ընդունելի ճանաչի, դիմողներն օրենքի կասեցման մեխանիզմն ակտիվացնելու միտումով կարող են միջնորդություն ներկայացնել՝ մինչև վերջնական որոշման ընդունումը։

Զուրաբիշվիլիից հետո Վրաստանի ավելի քան 120 հասարակական կազմակերպություններ ևս հայց են ներկայացրել Սահմանադրական դատարան՝ պահանջելով չեղարկել օրենքը։ Վարույթում դրա ընդունման մասին դեռևս չի հայտարարվել։