Երերույքի տաճարը շարունակում են ամրակայել

Հուլիսի 17-ին Երերույքի տաճարում ընթացող ամրակայման աշխատանքներին տեղում ծանոթանալու նպատակով հուշարձանի տարածք էր այցելել Շիրակի մարզպետի տեղակալ Աննա Մարտիկյանը՝ մարզպետարանի համապատասխան բաժինների աշխատակիցների հետ։ Պատմամշակութային ժառանգության գիտահետազոտական կենտրոնի տնօրեն Խաչիկ Հարությունյանի ուղեկցությամբ տիկին Մարտիկյանը շրջեց Երերույքի տաճարի և նրան հարակից ենթահուշարձանների հատվածներում, ծանոթացավ ընթացիկ ծրագրին և ամրակայման աշխատանքներին։

Շրջայցին ներկա էին նաև Պատմամշակութային ժառանգության գիտահետազոտական կենտրոնի գիտանախագծային աշխատանքների գծով տնօրենի տեղակալ Հովհաննես Սանամյանը, կապալառու ընկերության տնօրեն Լևիկ Ղուկասյանը, որը ներկայացրեց հուշարձանի ամրակայմանն առնչվող անհրաժեշտ մանրամասները։

Հիշեցնենք, որ Երերույքի տաճարի ամրակայման առաջին փուլի բուն աշխատանքները մեկնարկել են այս տարվա գարնանը և շարունակվելու են մինչև հոկտեմբերի վերջ։ Ամրակայման աշխատանքների պատվիրատուն Պատմամշակութային ժառանգության գիտահետազոտական կենտրոնն է։ Հեղինակային հսկողությունն իրականացնում է Ճարտարապետության և շինարարության Հայաստանի ազգային համալսարանը։ Կապալառու ընկերությունը «ԼԵՎԳՈՒԿ» ՓԲԸ-ն է։ Ծրագիրն իրականացվում է ԱՄՆ դեսպանի մշակութային արժեքների պահպանության հիմնադրամի տրամադրած դրամաշնորհով։