Դեսպանը Հունաստանի ինքնակառավարման մարմինների հետ համագործակցությունը տեսնում է ԵՄ գործիքակազմով

Հուլիսի 16-ին Հունաստանում ՀՀ արտակարգ և լիազոր դեսպան Տիգրան Մկրտչյանը հանդիպել է Կենտրոնական Մակեդոնիայի տարածաշրջանի կառավարիչ (մարզպետ) Ապոստոլոս Ձիձիկոստասի հետ։

Հանդիպմանը դեսպան Մկրտչյանը անդրադարձավ Հայաստանի և Հունաստանի ինքնակառավարման մարմինների միջև համագործակցության հաստատմանը, մարզային դիվանագիտության հնարավորությունների օգտագործմանը, համատեղ տնտեսական ծրագրեր իրականացնելու հնարավորություններին։

Դեսպանը նշեց, որ նման համագործակցությունը կարող է իրականանալ ինչպես երկկողմ ձևաչափով, այնպես էլ ԵՄ գործիքակազմերի կիրառմամբ՝ հաշվի առնելով Եվրամիության հետ Հայաստանի հարաբերությունների զարգացման ներկայիս աննախադեպ բարձր մակարդակը։

Ապոստոլոս Ձիձիկոստասն իր հերթին ողջունեց միջմարզային դիվանագիտության զարգացման հեռանկարը և խոստացավ առաջիկայում այցելել Հայաստան և տեղում ծանոթանալ երկկողմ տնտեսական հարաբերությունները և միջմարզային համագործակցությունը խթանելուն ուղղված հնարավորությունների հետ։

Կենտրոնական Մակեդոնիայի տարածաշրջանի ղեկավարը նշեց, որ Հայաստանի հետ բազմաշերտ հարաբերությունների զարգացումը Հունաստանի համար ունի մեծ կարևորություն։ Միաժամանակ նա ընդգծեց դարեր ի վեր Հունաստանի հասարակական-քաղաքական, մշակութային և տնտեսական կյանքում հայերի ունեցած դերի մասին։

Հանդիպմանը մասնակցում էր նաև Սալոնիկում ՀՀ պատվո հյուպատոս Ակիս Դագազյանը։