Մամիկոն Ասլանյանն այսօր ազա՞տ կարձակվի. Hraparak.am

Hraparak.am-ը գրել է.

Այսօր տեղի կունենա Վանաձորի ընտրված համայնքապետ Մամիկոն Ասլանյանի դատական հերթական նիստը: Հիշեցնենք, որ Ասլանյանն անազատության մեջ է 2021-ի դեկտեմբերից։ Նա մեղադրվում է պաշտոնավարման տարիներին կեղծ փաստաթղթեր կազմելու միջոցով Վանաձորից ինչ-որ հողեր օտարելու համար։ Մեղադրանք է առաջադրվել նաև նրա երկու ենթականերին՝ իրավաբանին ու համայնքի գլխավոր ճարտարապետին։ Նրանք, ի տարբերություն Ասլանյանի, ազատության մեջ են։ 

Այս քրեական գործի մասին իրավապահները հայտարարեցին և Ասլանյանին կալանավորեցին Վանաձորի ավագանու ընտրություններից անմիջապես հետո։ Նա այդպես էլ հնարավորություն չունեցավ համայնքապետի աշխատասենյակ վերադառնալ, չնայած 2021-ի ընտրություններին իր գլխավորած քաղաքական ուժը ամենաշատ թվով ձայներն էր ստացել և համայնքապետ ընտրվելուց հինգ պակաս նրան կալանավորեցին եւ արդեն մոտ 3 տարի է նա կալանավայրում է։ Տնտեսական մեղադրանքով մարդուն 3 տարի պահել բանտում, երբ պետությանը պատճառված վնասը մի քանի հարյուր հազար դրամ է՝ ըստ մեղադրանքի, դա բացառապես քաղաքական հետապնդում է։

Նկատենք, որ դատարանն ավելի քան 30 վկայի հարցաքննելուց հետո, իր իսկ նախաձեռնությամբ, հավելյալ յոթ վկայի էր ներգրավել դատաքննության փուլում, ինչը տպավորություն ստեղծեց, որ գործի քննությունը ձգձգելու նպատակով է արվում, որովհետեւ դատաքննությունն ավարտելուց հետո հայտնի չէ, թե ինչ հիմքով են Մամիկոն Ասլանյանին պահելու բանտում: 

Ասլանյանի փաստաբանական թիմից Արտակ Ոսկանյանը «Հրապարակին» հայտնեց, որ լրացուցիչ ներգրավված 7 վկայից 5-ին արդեն հարցաքննել են, այսօր պետք է հարցաքննեն վերջին երկուսին, ինչը նշանակում է, որ Ասլանյանին կալանքի տակ պահելու հիմքերը վերանում է։ Իհարկե, փաստաբանը կարծում է, որ վկաներից մեկը կարող է նիստին չներկայանա. «Այսօր դատարանը լսելու է տուժող կողմից մեկին և երկու վկայի: Երկուսից մեկը կարծեմ չի ներկայանալու», - ասաց փաստաբանը: 

Հարցին` եթե դատարանը երեք տարի շարունակ Ասլանյանին կալանքի տակ է պահում` վկաների վրա ազդեցություն չունենալու պատրվակով, հնարավո՞ր է նա այսօր ազատ արձակվի, քանի որ այլեւս չկա չհարցաքննված վկա, ուստի մեղադրյալը չի կարող նաեւ վկաների վրա անգամ տեսականորեն ազդեցություն գործել. «Ո՞վ կարող է ասել: Այն ժամանակ էլ 30 վկային հարցաքննեցին, նորից 7-ին ներգրավեցին: Ոչ ոք այդ հարցին չի կարող պատասխանել: Հիմա էլ կարող են այլ վկաների ներգրավել», - ասաց փաստաբանը: Մեղադրանքում նշվում է պետությանը Ասլանյանի հասցրած վնասների մասին, ի՞նչ վնասների մասին է խոսքը, որքա՞ն է կազմում այդ վնասը՝ ըստ մեղադրանքի. «Նյութական որևէ վնաս չկա, զրո վնաս», - եզրափակեց փաստաբանը: