«Նիկոլ Փաշինյանը մատ թափ տվեց մեր վրա ու ասեց՝ դուք ձեր հալը կտեսնեք». զոհված զինվորի մայրը ապշեցնող դրվագներ է պատմում վարչապետի հետ հանդիպումից

Aravot.am-ը գրում է․

«44-օրյա պատերազմում զոհված զինծառայողների մասունքները եւ դիերը Աբովյանի դիահերձարանի նկուղում պոլիէթիլենային տոպրակների մեջ գետնին գցելու սահմռկեցուցիչ տեսարանից հետո զինվորների ծնողները երդվեցին, որ պատասխանատուներից որեւէ մեկը անպատիժ չպիտի մնա: 3 տարի է անցել, երդումն ուժի մեջ է, պատասխանատուները՝ ազատության մեջ:

«Մտել եմ մորգ ու տեսել եմ իմ որդուն, ատում եմ ինձ, որ դեռ ապրում եմ այդ ահավոր տեսարանից հետո: Մարմնիս ամբողջ բջիջով ատում եմ էս իշխանությանը: Ես իմ ու իմ որդու մասունքի առաջ երդվեցի, որ վրեժս լուծելու եմ, ուղղակի չեք պատկերացնի ինչքան դժվար է վրեժի ցասումով ապրելը»,- սա գրել է զոհված զինծառայող Ժիրայր Մարգարյանի մայրը` Նաիրա Մարգարյանը՝ խնդրելով հրապարակել:

Առաջարկեցինք զրուցել, եւ այն, ինչ Aravot.am-ի հետ զրույցում պատմեց տիկին Նաիրան՝ մանրամասներ ներկայացնելով վարչապետ Նիկոլ Փաշինյանի հետ հանդիպումից ու նրա արձագանքից, պարզապես անպատկերացնելի է, ուստի ներկայացնում ենք զրույցի այդ հատվածն ամբողջությամբ.

«Ապրիլի 12-ն էր, Նիկոլ Փաշինյանի հետ այդ հանդիպումը շատ թեժ էր, շատ ծանր էր, դժվար էր: Վերջում ծնողների նյարդերը էլ չէին դիմանում, ոչ մի ձեւի ճակատագրերը հայտնի չէին դառնում: Էդ հանդիպման ժամանակ Նիկոլ Փաշինյանը մատ թափ տվեց մեր վրա ու ասեց՝ դուք ձեր հալը կտեսնեք ու դուրս եկավ ինքը էդ նիստերի դահլիճից: Էդ օրը հենց ինքը իր բերնով էր ասել, որ կան տղաների մարմիններ, ուղղակի նույնականացում չեն եղել, կարող է եւ թշնամու մարմիններն ենք բերել, որովհետեւ իրենք հագուստներն են փոխել: Ու հաջորդ օրը միանգամից  60 հոգու զանգ է գալիս, որ դուք ունեք նույնականացված մարմիններ: էդ 60 հոգու մեջ ես էլ էի: Գնացի Հերացի, մի ամբողջ ոստիկանական պատ էր շարված: Եթե իրանք ճիշտ էին, էդ պատն ինչի՞ համար էր, ինչի՞ց էին իրենք պաշտպանվում: Գնացի Քննչական,  ինձ ասեցին, որ երեխայի մարմինը գտնվում է Աբովյանում, գնացի Աբովյան, ու էդ ժամանակ բժշկին դիմեցի, որ  սառնարանը բացեն, ես իմ երեխային տեսնեմ, եթե ես զգամ, նմանություն գտնեմ, մոր սիրտս զգա, ես կվերցնեմ իմ երեխային: Բժիշկը ամեն ձեւ չթողեց, որ ես էդ րոպեին մտնեի այդտեղ, քանի որ երեխեքը գետնին էին՝ ոչ պատշաճ վիճակում: Բժշկի էդ խառնաշփոթ վիճակից ես եկա ու կրկնակի ԴՆԹ անալիզ տվեցի, 3 ամիս սպասեցի, որ պատասխանը գար: 3 ամիս եմ սպասել, քանի որ Բիշարյանն ասում էր 48 ժամ, դա դարձավ 3 ամիս: Երկար դռներ բախելուց հետո, ուղիղ 9 ամիս լրանալու օրը զանգեցին, թե՝ ձերը համընկել է: Պարզվեց իմ երեխան հենց Աբովյանի մորգի երեխան էր, ուղղակի Աբովյանից տեղափոխել էին Մարտունի՝ ծնողների բացահայտումից հետո»:

Ճշտեցինք՝ մատ ինչի՞ էր թափ տալիս Փաշինյանը ծնողների վրա, ինչո՞ւ էր դա անում՝ Նաիրա Մարգարյանը պատասխանեց.

«Որովհետեւ էն ժամանակ լուրեր էին տարածվել, որ երեխեքը Պարսկաստան կարող էին անցած լինել, ես դիմեցի Արսեն Թորոսյանին, ասեցի՝ անծուխ կրակ չի լինի, ուրեմն մի բան կա, հնարավոր է սահմանն անցած լինեն, Թորոսյանն ասեց՝ էդպիսի լուր չկա: Տղամարդիկ (զոհվածների ծնողները) ջղայնացան, թե ինչի՞ ես դու խառնվում, եթե դու դրանից տեղյակ չես, դու Պարսկաստանում եղե՞լ ես, հնարավոր է այնտեղ են: Էդ  րոպեին Նիկոլ Փաշինյանը ջղայնացավ, մատ թափ տվեց, թե դուք կտեսնեք ձեր հալը, թե մենք մեզ կարգին չենք պահում, բռնկվել ենք, բարձր տոնով եք խոսացել»:

Նաիրա Մարգարյանը եւս մի ուշագրավ դրվագ ներկայացրեց վարչապետի հետ հանդիպումից.

«Իր պատճառով շրջափակման մեջ մնացած 6 զինվորները զոհվեցին, 6-ին գտան: Ծնողների մոտ սլաքն ուղղեց լրագրողների վրա, թե՝ եթե լրագրողները չբարձրաձայնեին, իրենց տեղը չէին իմանա: Բայց այդ ծնողները ավելի շուտ գիտեին, որ իրենց տղաները ողջ են: Նիկոլ Փաշինյանին հենց էդ տղաներից մեկի մաման էր, իմ կողքը նստած էր էդ հանդիպման ժամանակ, ասեց՝ իմ տղան ողջ է, այս-այս նշանները կան, որ իմ տղան կա, անտառում է, իրեն զանգել են: Ինքը  դառավ կողքինին, ասեց՝ բա որ կենդանի են, ասենք, ողջ են, իրանք ինչո՞վ են սնվում: Իրան մենակ էդ հարցը հուզեց՝ ուտելը, իրան մենակ էդ սնվելը հետաքրքրեց, ոչ թե ինչ դիվանագիտական աշխատանքներ կարող են տանել թշնամու հետ, ինչ միջոցներ ձեռնարկեն, որ էդ երեխեքին անփորձանք դուրս հանեն: Առաջ ասում էր՝ էն 17 կուսակցություններն են, իրենց պատճառով չեն թողնում մտնենք իրենց տարածքները, երեխեքի մարմինները հանենք, ընդդիմադիրներն են: Ինքը միշտ մեղավոր է, բայց  սխալները գցում է մեկելների վրա: Հիմա այդ մայրը ոչ թե Նիկոլին է մեղադրում, այլ լրագրողներին»»: