Դատապարտյալների հիվանդանոցին հնամաշ ու ժանգոտած «Գազել» է սպասարկում. MediaHub (տեսանյութ)

MediaHub-ը գրում է.

Հայաստանի շտապօգնության պարկը վերջին տարիներին մի քանի անգամ թարմացվեց՝ համալրվելով արտասահմանյան նոր մեքենաներով։ Նախ Չինաստանից շտապօգնության նոր մեքենաներ եկան, որոնք տևական ժամանակ ծառայելուց հետո փոխարինվեցին արդեն ճապոնական արտադրության Toyota մակնիշի նոր ու ժամանակակից շտապօգնության մեքենաներով։ Հիմա գրեթե ամբողջ պարկը այդպիսի մեքենաներ են։ Բայց դա չի վերաբերում, օրինակ, Դատապարտյալների հիվանդանոցին, որի շտապօգնության մեքենաները մինչ օրս դեռ ռուսական արտադրության հնամաշ և ժամանակակից բոլոր սարքավորումներից զուրկ «Գազելներ» են։ Այդպիսի մի «Գազել» MediaHub-ի տեսախցիկն այսօր ֆիքսեց Մյասնիկյան պողոտայում՝ խամրած, գունաթափված, ժանգոտած, բամպերները՝ ծուռ, թափքը՝ տեղ-տեղ վնասվածք, մի խոսքով՝ մի իսկակակն մետաղի ջարդոն, որի վրա 1-03 էր փակցված։ Դիմացն էլ Քրեակատարողական հիմնարկի համազգեստով տղամարդիկ էին նստած։

Մենք հետաքրքրվեցինք արդարադատության նախարարությունից, թե ո՞րն է պատճառը, որ ամբողջ բնակչությանը նոր ու ժամանակակից շտապօգնության մեքենաներ են սպասարկում, և միայն դատապարտյալներին է, որ այս կիսասովետական հնամաշ տեխնիկան է սպասարկում։

Արդարադատության նախարարությունից տվեցին այսպիսի պատասխան․ «Քրեակատարողական ծառայության ավտոպարկի թարմացման աշխատանքների շրջանակում նախատեսվում է մեքենաների փոխարինում նոր և ժամանակակից մոդելներով։ Մինչև ամբողջական թարմացումը, որոշ աշխատանքներ իրականացվում են պարկում եղած ռեսուրսների հաշվին»։

Հետաքրքիր է, որ շտապօգնության ամբողջ ավտոպարկը թարմացվել է, իսկ Քրեակատարողական հիմնարկները նոր են գլխի ընկել, որ իրենց մոտ էլ կարիք կա պարկի թարմացման, և որ դատապարտյալներն էլ են մարդ, իրենց էլ կարելի է քիչ թե շատ նորմալ պայմաններում սպասարկել։ ԱՆ-ից, թեպետ, ասացին, որ սա շտապօգնության ընդհանուր պարկի թարմացման հետ կապ չունի՝ իրենցն առանձին է։