2,2 մլրդ դրամ` 20 համայնքներում 26 սուբվենցիոն ծրագրերի համար

Կառավարությունն իր այսօրվա՝ հուլիսի 11-ի նիստում որոշեց 2024-ի բյուջեից ՀՀ մարզպետների աշխատակազմերին հատկացնել 2 մլրդ 229 մլն դրամ՝ սուբվենցիոն ծրագրերի շրջանակում համապատասխան շինարարական կազմակերպությունների նկատմամբ ֆինանսական պարտավորությունները կատարելու համար:

Հիմնավորման մեջ նշվում է, որ ՀՀ 2021, 2022, 2023 թվականներին հաստատված և իրականացման փուլում գտնվող մի շարք ծրագրերի աշխատանքների գծով համայնքների հետ կնքված սուբվենցիայի տրամադրման պայմանագրերի գործողության ժամկետը երկարաձգվել է մինչև 2024 թվականի նոյեմբերի 1-ը՝ եղանակային ոչ բարենպաստ պայմանների և կատարված աշխատանքների որակի պահպանման պատճառով:

ՏԿԵ նախարար Գնել Սանոսյանը նշեց, որ այդ գումարը հատկացվում է 8 մարզերի 20 համայնքների թվով 26 սուբվենցիոն ծրագրեր ֆինանսավորելու համար:

«Ծրագրերից մեկը 2021 թվականի է, 7-ը՝ 2022-ի, 18-ը՝ 2023-ի համար է: Արագածոտնի մարզի 2 ծրագրերի համար առաջարկվում է վճարել 292 մլն դրամ, Արարատի մարզում 5 ծրագրի համար՝ 529 մլն դրամ, Արմվիրում 6 ծրագրի համար 373 մլն դրամ, Գեղարքունիքում 1 ծրագրի համար՝ 57 մլն դրամ, Լոռիում 5 ծրագրի համար 488 մլն դրամ, Կոտայքում 2 ծրագրի համար 187 մլն դրամ, Շիրակում 4 ծրագրի համար 246 մլն դրամ եւ տավուշում 1 ծրագրի համար 54 մլն դրամ:

Այս որոշումից հետո արդեն կառավարությունը մի շարք որոշումներով այս տարի 12 մլրդ 306 մլն դրամ հատկացրած կլինի սուբվենցիոն ծրագրերին»,-ասաց նա:

Վարչապետ Նիկոլ Փաշինյանը ավանդույթի համաձայն հերթով թվարկեց բոլոր այդ ծրագրերը՝ նշելով, թե աշխատանքների որ մասն է կատարված այս պահին: