Վեդիում ցեմենտի գործարանի կառուցման աղմկահարույց նախագծի շուրջ թվով` 4-րդ հանրային լսումները կանցկացվեն այսօր` Վեդու Գինեվետ գյուղում

Կարմիր բլուրի հաշվին նույն բնակավայրում կառուցվող ցեմենտի գործարանը կլինի Արարատի մարզում երկրորդը, ինչը խիստ անհանգստացրել է թե մարզի բնակչությանը եւ թե բնապահպաններին։

Նոր արտադրական միավորման ստեղծումը Արարատում, ըստ բնապահպանների, կարող է աղետալի հետեւանքներ բերել թե բնաշխարհը անապատացնելու ու թե հանրային առողջությունը վտանգելու տեսանկյունից։

Մեծ ռիսկեր պարունակող ներդրումային ծրագիրը, սակայն, համառորեն 2 տարի մնում է օրակարգում եւ քննարկվում հանրային լսարանի առաջ` Վեդու խոշորացված համայնքի տարբեր գյուղերում։ Միակ արգումենտը, որով փորձ է արվում գայթակղել բնակչությանը եւ ջախջախել ընդվզող շերտին, դա նոր աշխատատեղերի հեռանկարն է, ուրիշ առաջարկ չունի ներդրողը եւ մեծ հաշվով միայն դրանով կարող է զսպել կրքերը բնակչության շրջանում։

Մինչդեռ Արարատի մարզի անապատացումը միայն արարատցիների խնդիրը չէ ու հանրային առողջության վնասակար նյութերի արտանետումների հետեւանքները կրելու է ողջ Հայաստանի բնակչությունը, սակայն քննարկումները հնարավորինս նեղ շրջանակի են հուզում առայժմ եւ կառավարության մտադրությունները խափանելու փորձ չի արվում ավելի լայն հանրային շերտում ու ազդեցիկ ռեսուրսների կողմից։ 

Այսօր Գինեվետ գյուղում, որտեղ նաեւ գործում է Վեդի Ալկո խմիչքի գործարանը, ժամը 14:00-ին նախատեսված է նոր ցեմենտի գործարանի կառուցման նախագծի հանրային լսումներ, սովորաբար այս թեժ քննարկումներին  մասնակցում է  տեղի ակտիվը, բնապահպաններ եւ Վեդու ավագանու ընդդիմադիր «Պատիվ ունեմ»  խմբակցության  անդամներ։