Հոգով պարտվածները. Hraparak.am

Hraparak.am-ը գրել է.

Ասում ես` 30 տարի 2 հայկական պետություն ունեինք, դուք 2018-ին եկաք ու վերացրիք մեկը, մյուսի ճակատագիրն էլ անորոշ է, ասում են` 1991-ին արդեն հանձնված էր Արցախը: Ասում ես` նախորդ պատերազմներում հաղթել էինք, թշնամու բոլոր հարձակումներին արժանի հակահարված տվել, դուք պարտվեցիք ու պարտությունը դարձրիք մեր մշտական ուղեկիցը, ասում են` 30 տարի բանակ ու զենք չենք ունեցել, հաղթանակները պատահականություն էին, ռուսների օգնությամբ եք հաղթել: Ասում ես` չկարողացաք անգամ կապիտուլյացիայի փաստաթղթի` նոյեմբերի 9-ի կատարումն ապահովել, ասում են` ռուսներն են մեղավոր, ՌԴ նախագահը պետք է պարտադրեր դա: Ասում ես` էդ դեպքում ռուսների հետ ինչո՞ւ փչացրիք հարաբերությունները, ասում են` ամբողջ աշխարհն է նրանց դեմ: Ասում ես` 30 տարի մեր տնօրինության տակ գտնվող հողերն առանց կռվի հանձնում եք թշնամուն, ասում են` դա իրենց հողն է: Ասում ես` իսկ ինչո՞ւ մեզնից գրաված հողերը հետ չեք վերցնում, եթե 1991-ի սահմաններով եք առաջնորդվում, ասում են` սպասեք, կարող է հետ տան:

Ասում ես` Գորիս-Կապան մայրուղին տվեցիք թշնամուն, վաղը դեպի Վրաստան ու դեպի Վայոց Ձոր գնացող ճանապարհներն են գրավելու, ասում են` սահմանազատում ենք անում: Ասում ես` իսկ ինչո՞ւ Տավուշի, Ջերմուկի, Սեւ լճի, Սոթքի ու Ներքին Հանդի հատվածներում սահմանազատում չի արվում, ինչո՞ւ առանց սահմանազատման հանձնեցիք Գորիս-Կապան մայրուղին, Կիրանցի կեսը: Ասում են` պարտվել ենք, ենթարկվում ենք թշնամու կամքին, չտանք` պատերազմ կսկսեն: Բա էդ բոլոր լոլոներն ինչի՞ համար են` սահմանազատում, Ալմա-Աթայի հռչակագիր, սպիտակ սյուն, պայմանագիր, խաղաղություն... եթե վերջում պետք է պարտությամբ արդարանաք ու խոստովանեք, որ այս բոլորը հոգով պարտվածի, խեղճի, վախկոտի քայլեր են: