Նույն Ոսկեպարն է՝ իշխանությունը սահման է գծում․ Hraparak.am

Hraparak.am-ը գրում է.

 

Երեկ ուշադիր հետևում էի Ազատության պողոտայում տեղի ունեցող լարված դեպքերին։ Ես էլ Ազատության պողոտայում եմ բնակվում։ Երեք շենքերի բնակիչները մի մարդու նման դուրս էին եկել ու պահանջում էին ապօրինի շինթույլտվությամբ և քաղաքաշինական նորմերի կոպիտ խախտումներով կառուցվող մասնավոր բժշկական կլինիկայի շինաշխատանքը։ Բողոքը տեղին էր՝ իրենց իրավունքներն էին պաշտպանում, բայց ես համեմատություն  էի անցկացնում ու մտածում՝ տեսնես այս բողոքողներից, քանի՞սն են բողոքել, երբ Արցախը կամ Հայստանի տարածքները հանձնվում էին։ Քանի՞սն են այդպես «դոշ տվել» ոստիկանների հետ։ Այդպիսին է հայերի մեծամասնությունը։ Այն , որ ասում եք՝ անտարբեր են, սխա՜լ եք ասում, իրենք անտարբեր են այնքան ժամանակ, մինչև հարցը չի հասնում սեփական բնակարանին։ Ինչևէ, ինձ այլ հարց էր հետաքրքրում։ Գիտեի, որ իշխանության ձեռագիրը նույնն է, ուժով, զոռով, ոստիկաններով իրենց ուզածը անելու են։ Բնակիչն ո՞վ է, որ նրա բողոքն էլ հաշվի առնեն։ ՀՀ քաղաքացին անխոս հանձնում է իր գյուղերը։ Ծեծով, կապտուկով, ոստիկանություն քարշ տալով՝ կխրատեն ու նիկոլյան բառապաշարով կասեն՝ խելոք նստեք տեղներդ։ Դուք չեք որոշելու, թե ես ինչ պիտի անեմ, ի՞նչ պիտի տամ։

 

Իմ մտքում ուրիշ բան էր։ Նիկոլ Փաշինյանը Սյունիքի Ճակատեն գյուղում  աշխարհից անտեղյակ գյուղացիներին մի նկար է ցույց տվել, թե ինչպես են Ոսկեպարում սահմանազատում կատարել։ Ասել է․  «Եթե բարեհաջող հասնենք այստեղ, սահմանազատենք․․․Ուզում եմ ձեզ ցույց տալ, թե Ոսկեպարի հատվածում ինչ ենք անում։ Սահմանի երկայնքով փշալարերի ցանկապատ ենք սարքում։ Կովն այստեղ չի էլ կարողանա հասնել, սահմանապահներ էլ կլինեն, բայց եթե հասնի էլ, չի անցնի սահմանը»։ Բագրատ Սրբազանն էլ աշխարհքով մեկ էր արել նրա սուտը։ Գնացել էր Տավուշ, ամեն տեղ շրջել էր, նման բան չէր եղել։ Հետո միանգամից նման բաներ էին տնկել ու Նիկոլը, ՔՊ-ականները գնում ու այդ փշալարերի կողքից «երանելի ֆոտոսեսիաներ են կազմակերպում»։

 

Տեսեք, տեսեք՝ ինչ ապահով են ոսկեպարցիները։ Ինձ զարմացրեց այդ շուտափութությունը։ Բայց այսօր երեկոյան կողմ Ազատության պողոտա գնալով, հասկացա, թե իշխանությունը սեփական անօրինական ծրագրերն իրականացնելուց ի՜նչ արագություն է դրսևորում։ Տարածն ամբողջովին փակված էր արդեն։ Ե՜րբ հասցրին։ Մարդիկ խեղջացած այգու այս ու այն կողմում նստած խոսում էին, հեռախոսով նայում , թե ինչ են գրում թերթերն իրենց մասին։ Ոստիկանները լցված էին այգին՝ տարբեր անկյուններում, նստարանների վրա նստած սպասում էին։ Բանվորները  քրտինքի մեջ աշխատում էին։ Մի քանի ժամ չկար, բայց արդեն փակել էին շինտեղամասը։ Ոսկեպարում էլ այդպես արագ բերել ու փշալարեր են անցկացրել, թե իբր Նիկոլը սուտ չի ասել։ Անօրինականությունը քողարկելու համար սրանց վայրկյաններ են պե՜տք․․․ Արդեն շատ ուշ էր, երբ տուն վերադարձա։ Այգին լցված էր ոստիկաններով ու բնակիչներով։ Բնակիչները խոսում էին անօրինականությունից, իսկ ոստիկանները հսկում էին, որ հանկարծ մեկի մտքով չանցնի՝ մի քայլ անի։ Ինձ թվաց, որ ոստիկանները գիշերը լուսացնելու են այգում։ Նույն Ոսկեպարն է՝ իշխանությունը կռվում է սեփական ժողովրդի դեմ․․․ Սահման է գծում։ Կկանգնեն, կծեծեն, կահաբեկեն մարդկանց, որ տներով ցրվեն։

 

 

Հասմիկ Բաբաջանյան