Թունավորումից մահացած 4-ամյա աղջիկը Շինուհայրից էր. այսօր տեղի ունեցավ նրա հուղարկավորության արարողությունը

Հուլիսի 5-ին «սուր էկզոգեն թունավորում» ախտորոշմամբ Գորիսի ԲԿ տեղափոխված ընտանիքը Սյունիքի մարզի Շինուհայր գյուղից է. այսօր գյուղում տեղի ունեցավ ընտանիքի 4-ամյա դստեր հուղարկավորությունը: Այս մասին այսօր՝ հուլիսի 8-ին, NEWS.am-ի թղթակցի հետ զրույցում ասաել է Տաթև համայնքի վարչական ղեկավար Սամվել Լալայանը: «Գյուղի ժողովուրդ են, գյուղատնտեսությամբ զբաղվող, իրենց համար խելոք ապրող ընտանիք են»,- ասաց նա:

Գորիսի մարզպետարանից NEWS.am-ին հայտնել են, որ երեխաներից մեկը տեղափոխվել է Երևանի «Մուրացան» հիվանդանոցային համալիր, նրա վիճակը գնահատվում է ծանր, մյուս երեք երեխաները շարունակում են մնալ Գորիսի ԲԿ-ում, նրանց առողջական վիճակը գնահատվում է բավարար: Ընտանիքի հայրն ու մայրն արդեն դուրս են գրվել հիվանդանոցից: Քննչական կոմիտեից էլ հայտնեցին, որ դեպքի առթիվ ՔԿ-ում վարույթ է նախաձեռնվել Քրեական օրենսգրքի 412-րդ հոդվածի 2-րդ կետի 2-րդ մասի հատկանիշներով, այն է՝ անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը, որը անզգուշությամբ առաջացրել է մարդու մահ, առողջությանը ծանր վնասի պատճառում կամ այլ ծանր հետևանք: 

Հիշեցնենք, որ հուլիսի 5-ին՝ ժամը 23:50-ի սահմաններում ՀՀ ՆԳՆ ոստիկանության Սյունիքի մարզային վարչությունում տեղեկություններ էին ստացվել, որ ժամը 22:00-ի սահմաններւոմ «Գորիս» բժշկական կենտրոն են տեղափոխվել մի քանի քաղաքացիներ՝ «սուր էկզոգեն թունավորում» ախտորոշմամբ: Ընտանիքի անդամներից մեկը՝ 4-ամյա աղջիկը հիվանդանոցում գիտակցության չգալով մահացել էր: