Երևանն ու Բաքուն դեռ չեն հաստատել՝ արդյոք Միրզոյանն ու Բայրամովն արդեն մեկնել են Վաշինգտոն

Ոչ Երևանը և ոչ էլ Բաքուն դեռ չեն հաստատել՝ արդյոք արտգործնախարարներ Արարատ Միրզոյանն ու Ջեյհուն Բայրամովը արդեն մեկնել են Վաշինգտոն՝ մասնակցելու վաղը այնտեղ կայանալիք ՆԱՏՕ-ի գագաթնաժողովին։ Այս մասին գրում է azatutyun.am-ը։

Այն, որ Հայաստանն ու Ադրբեջանը հրավիրվել են ՆԱՏՕ-ի 2024-ի գործընկերների հետ հանդիպմանը, հունիսի վերջին Բաքվում տեղեկացրեց ԱՄՆ պետքարտուղարի տեղակալ Ջեյմս Օ'Բրայենը։

«Ես ակնկալում եմ, որ երկու երկրներն էլ կմասնակցեն միջոցառմանը, ընդհանուր առմամբ, 30 գործընկեր երկիր», - ասել էր Օ'Բրայենը՝ չհստակեցնելով, արդյոք հնարավոր է, որ հուլիսի 9-11-ը կայանալիք ՆԱՏՕ -ի գագաթնաժողովի շրջանակներում տեղի ունենա նաև Միրզոյան- Բայրամով հանդիպում։

Ամեն դեպքում, վաղը մեկնարկելիք ՆԱՏՕ-ի գագաթնաժողովից առաջ Բաքուն ևս մեկ անգամ հիշեցրել է խաղաղության պայմանագրի ստորագրման իր նախապայմանը։ Ադրբեջանի արտգործնախարար Ջեյհուն Բայրամովը կրկին պնդել է՝ Հայաստանը պետք է փոխի իր Սահմանադրությունը, որտեղ տարածքային պահանջներ կան Ադրբեջանի դեմ։ Բաքուն խնդրահարույց է համարում Հայաստանի մայր օրենքում Անկախության հռչակագրի հիշատակումը, որտեղ խոսվում է Հայաստանի և Արցախի միավորման մասին։

«Հայաստանի Սահմանադրության մեջ դեռևս կան Ադրբեջանի նկատմամբ տարածքային պահանջներ։ Մենք ակնկալում ենք, որ հայկական կողմը քայլեր կձեռնարկի այդ ուղղությամբ։ Լիակատար խաղաղության հասնելու համար այդ գործոնը պետք է վերացվի», - նշել է Բայրամովը։

Անդրադառնալով Երևանի և Բաքվի միջև խաղաղության պայմանագրի շուրջ բանակցություններին, Ադրբեջանի արտգործնախարարն այսօր նշել է, որ դրանք ընթանում են տարբեր ուղղություններով։ Բայրամովը շեշտել է, թե հունիսի վերջին Ադրբեջանը հայկական կողմին է ուղարկել խաղաղության պայմանագրի շուրջ իրենց առաջարկները, ընդգծելով, թե բաց հարցերի թիվը զգալիորեն նվազել է։ Թե կոնկրետ ո՞ր հարցերում են Հայաստանն ու Ադրբեջանը համաձայնության եկել, Բայրամովը չի մանրամասնել։

Կողմերը խաղաղության պայմանագրի նախագծի տեքստը գաղտնի են պահում։ Հունիսի վերջին Անվտանգության խորհրդի քարտուղար Արմեն Գրիգորյանը հայտարարեց, թե Երևանը ստացել է խաղաղության պայմանագրի առաջարկների 10-րդ փաթեթը և այժմ աշխատում է դրանց ուղղությամբ։