Լավրովն ԱՄՆ նախընտրական քարոզարշավն անվանել է «տխուր տեսարան»
Ռուսաստանի արտգործնախարար Սերգեյ Լավրովը «Մոսկվա» հաղորդաշարի եթերում, որը հեռարձակվում է «Россия 1» հեռուստաալիքով, ԱՄՆ-ի նախընտրական քարոզարշավն անվանել է «տխուր տեսարան»՝ հավելելով, որ յուրաքանչյուրը կարող է հանել սեփական եզրակացություններ այն մասին, թե ինչպես են այնտեղ գործերը «դասավորվել»:
«Դա տխուր տեսարան է, եթե այսպես կոչված ամերիկյան ժողովրդավարության համակարգը նման արդյունքներ տա, յուրաքանչյուրը կարող է իր եզրակացությունն անել, թե ինչպես է այս ամենը կազմակերպված և դասավորված»,- ասել է Լավրովը։
Ամերիկյան լրատվամիջոցները համաձայն են, որ ԱՄՆ ներկայիս նախագահ Ջո Բայդենը վատ է հանդես եկել հանրապետական Դոնալդ Թրամփի հետ առաջին բանավեճում, որը տեղի է ունեցել հունիսի 28-ի գիշերը Ատլանտայում։
Այժմ քաղաքական գործիչներն ու լրագրողներն ասում են, որ դեմոկրատները կարող են հրաժարվել Բայդենին առաջադրելուց և նրան փոխարինել մեկ այլ թեկնածուով։
Տեսականորեն կուսակցությունը նման հնարավորություն կունենա օգոստոսին կայանալիք համագումարում, սակայն գործնականում դժվար կլինի ընտրապայքարից հեռացնել նախնական ընտրություններում հաղթած Բայդենին, եթե նա ինքը չհրաժարվի մասնակցել։
Միաժամանակ գործող նախագահի շտաբից ասում են, որ նա չի պատրաստվում հանձնվել ու հեռանալ մրցավազքից։
Ըստ որոշ տեղեկությունների՝ նա որպես նախագահի թեկնածու կարող է առաջադրվել արդեն հուլիսի 21-ին՝ չսպասելով օգոստոսին կայանալիք կուսակցության համագումարին։
Բայդեն-Թրամփ երկրորդ բանավեճը նախատեսված է սեպտեմբերի 10-ին։ ԱՄՆ նախագահական ընտրությունները տեղի կունենան նոյեմբերի 5-ին։