Հայ-ռուսական երկխոսության զարգացում Ռուսաստանյան պատմական ընկերության հետ փոխգործակցությամբ

Մոսկվայում, Ռուսաստանյան պատմական ընկերության Վորոնցովո պոլեի տանը տեղի է ունեցել  Ռուսաստանյան պատմական ընկերության վարչության նախագահ, «Հայրենիքի պատմություն» հիմնադրամի գործադիր տնօրեն Ռուսլան Գագկուևի և ԴԻԱԼՈԳ կազմակերպության նախագահ Յուրի Նավոյանի հանդիպումը։ 

Ռուսլան Գագկուևը տեղեկացրել է պատմական կրթության, պատմական ճշմարտության պաշտպանության և պատմական հիշողության պահպանման ուղղությամբ Ռուսաստանյան պատմական ընկերության առաջիկա միջոցառումների մասին։

Իր հերթին, Յուրի Նավոյանը պատմել է հասարակական դիվանագիտության գծով ԴԻԱԼՈԳ կազմակերպության նախատեսված ծրագրերի մասին և ներկայացրել է իր պատկերացումները Ռուսաստանյան պատմական ընկերության հետ համագործակցության հեռանկարների վերաբերյալ։

Հանդիպման ընթացքում կողմերը ընդգծել են պարբերաբար շփումների պահպանման, գիտական նյութերի փոխանակման և Ռուսաստանյան պատմական ընկերության ծրագրերում հայ պատմաբանների ընդգրկման անհրաժեշտությունը։

Զրուցակիցները պատրաստակամություն են հայտնել նաև համատեղ միջոցառումներ անցկացնել փոխադարձ հետաքրքրություն ներկայացնող խնդիրների վերաբերյալ և համատեղ հետազոտություններ իրականացնել ըստ համաձայնեցված թեմաների։

Հանդիպման ավարտին Յուրի Նավոյանը Ռուսաստանյան պատմական ընկերության ղեկավարությանը նվիրել է իր ղեկավարած կազմակերպության «Գրքային դիվանագիտություն» ծրագրի հրատարակությունները․ հայ-ռուսական համաձայնագրերի «Հայաստանի Հանրապետություն և Ռուսաստանի Դաշնություն․ դաշնակցային փոխգործակցության 30 տարի» եռահատորյակը, ԴԻԱԼՈԳ մատենաշարում լույս տեսած հայ և ռուս հեղինակների գրքերը, ինչպես նաև «Լիտերատուրնայա Արմենիա» ամսագրի թարմ համարը, որը լույս է տեսնում ԴԻԱԼՈԳ կազմակերպության հովանավորությամբ։ 

Ռուսլան Գագկուևը ընկերության հյուրին է նվիրել Ռուսաստանյան պատմական ընկերության Վորոնցովո պոլեի տան մասին պատմող պատկերազարդ գիրք-ալբոմը։

Նշենք, որ Ռուսաստանյան պատմական ընկերությունը, իրբրև գիտական հասարակական կազմակերպություն հիմնադրվել է 2012 թվականին։ Համարվում է 1866-1917 թթ․ գործած Ռուսական կայսերական պատմական ընկերության իրավահաջորդը։

Ռուսաստանյան պատմական ընկերության նախագահը Սերգեյ Նարիշկինն է։