Սա դեռ ծաղիկն է. գործադուլներ կլինեն բոլոր դատարաններում. երբ Կարեն Անդրեասյանի ու ԲԴԽ անդամների աշխատավարձը բարձրացնելու փող կա, մյուսների համար՝ չկա

Այսօր առավոտյան հայտնի դարձավ, որ Վարչական դատարանի աշխատակիցները գործադուլ են անում, և պատճառը վերջիններիս ստացած աղետալի ցածր աշխատավարձն է՝ անմարդկային ծանրաբեռնվածության պայմաններում:

«Վարչական դատարանի աշխատակիցների կողմից իրականացվող գործադուլը կապված է աշխատավարձերի բարձրացման պահանջի հետ:

Դատական իշխանությունը, դեռևս 2023 թվականից, տարբեր մակարդակներում, տարբեր միջոցներով բազմիցս բարձրացրել է այս ցավոտ խնդիրը։

Դատական դեպարտամենտը և Դատական իշխանության մյուս մարմիններն իրենց լիազորությունների շրջանակում բոլոր հնարավոր գործողությունները կատարել են, և հարցը գտնվում է պետական պատշաճ մարմինների ուշադրության կենտրոնում»,- մասնավորապես գրված էր Դատական դեպարտամենտի տարածած հաղորդագրության մեջ:

Այն, որ այս օրը գալու էր, 168.am-ը զգուշացրել էր դեռևս ամիսներ առաջ, երբ հայտնաբերել էինք, որ Բարձրագույն դատական խորհուրդը (ԲԴԽ) 4 լրիվ նոր ավտոմեքենա էր ձեռք բերել ավտոսրահից:

Մեկ ամիս անց ԲԴԽ-ն ընդունեց նոր ավտոմեքենաների ձեռքբերման փաստը:

«Տեղեկացնում ենք, որ դատարանների բնականոն գործունեության ապահովման պահանջից ելնելով, որոնց թվում են, օրինակ՝ գաղտնի փաստաթղթաշրջանառության կազմակերպումը, պահեստից ապրանքների տեղափոխումը, ներպետական  գործուղումների՝ այդ թվում արտագնա նիստերին դատավորների մասնակցության ապահովումը, Դատական դեպարտամենտը 34 միլիոն դրամ արժողությամբ թվով 4 մեքենաների գնում է կատարել, որոնք տրամադրվելու են Սյունիքի մարզի, Հակակոռուպցիոն, Վերաքննիչ հակակոռուպցիոն և Երևանի ընդհանուր իրավասության քաղաքացիական մասնագիտացման դատարաններին»,- ասել էր ԲԴԽ-ն՝ ըստ էության ակնարկելով, որ նոփ-նոր, սալոնից գնված մեքենաները, որոնց համար վճարվել էր 34 միլիոն ՀՀ դրամ, թուղթ տանել-բերելու համար են:

Հենց այդ ժամանակ էլ մենք տեղեկացրել էինք դատական կազմի ամենախոցելի ու ամենածանր աշխատանք կատարող խավի՝ դատավորների օգնականների, նիստերի քարտուղարների, գործավարների ֆինանսական խնդիրների մասին, որոնց առանց այդ էլ ցածր աշխատավարձն են իջեցրել՝ նվազեցնելով նրանց ամենամսյա հավելավճարի չափը:

Բայց այս մասին ԲԴԽ-ն որևէ անգամ չբարձրաձայնեց, չփորձեց որևէ կերպ առարկայական լուծում տալ այն մարդկանց խնդիրներին, ովքեր աշխատում են օրը գրեթե 10-12 ժամ՝ ստանալով 80-90.000 դրամ աշխատավարձ:

ԲԴԽ նախագահ Կարեն Անդրեասյանը, արդարադատության նախարար Գրիգոր Մինասյանը, ովքեր օրնիբուն երկարաշունչ հաղորդագրություններ են տարածում դատական համակարգի «բարեփոխումների» մասին, վստահաբար այդ գումարով չեն կարող ո՛չ ապրել, ո՛չ համատեղ հանգստի մեկնել եվրոպաներ, և ո՛չ էլ պայմանական Հունաստանում տուն գնել ու վերանորոգել:

Այս մարդիկ յուրաքանչյուր առիթով կամ անառիթ «բարեփոխումների» մասին խոսելիս մոռացել են, որ չի կարող լինել որևէ բարեփոխում, եթե համակարգում մի ստվար զանգված աշխատում է ողորմելի աշխատավարձով, ու մի օր մարդկանց համբերության բաժակը լցվելու էր ու պայթեր:

Ի դեպ, ամիսներ առաջ՝ այդ հրապարակումը կատարելիս, մենք գրել էինք, որ նույն ԲԴԽ-ն ու Դատական դեպարտամենտը «լացում» են, թե Ֆինանսների նախարարությունը փող չի տալիս: Այսինքն՝ կարելի է այս անձանց աշխատեցնել զօրուգիշեր ու փողը չտալ, բայց թուղթ տանել-բերելու համար սալոնից նոր մեքենաներ գնել:

Այսօր տարածած հաղորդագրության մեջ Դատական դեպարտամենտը հարցն իր վրայից գցել ու շատ թափանցիկ ակնարկել էր, որ ըստ էության ինչ թուղթ պետք է, իրենք ներկայացրել են, Նիկոլ Փաշինյանի «մարդակենտրոն» «փառապանծ» կառավարությունը փողը չի տալիս:

Վարչական դատարանի աշխատակիցների գործադուլը միայն ծաղիկն է. գործադուլների շղթան շարունակական է լինելու ու տարածվելու է ՀՀ բոլոր դատարաններով: Այ այդ ժամանակ Նիկոլ Փաշինյանն ու արդարադատության համակարգի պատասխանատուները կտեսնեն՝ որն է իրական կոլապսը:

Ի դեպ, Կարեն Անդրեասյանը ԲԴԽ նախագահ դառնալուն պես ամեն ինչ արեց՝ բարձրացնելու համար իր և ԲԴԽ անդամների աշխատավարձերը: Կարեն Անդրեասյանը հիմա ԲԴԽ շենքն է վերանորոգում, դատարանների շենքեր է վերանորոգում, մեքենաներ է գնում, անդադար գործուղման է մեկնում, Դիլիջանում փարթիներ է կազմակերպում՝ անունը քննարկումներ դնելով, 9 միլիոն դրամով ոչինչ չասող ֆիլմ է նկարում, որ գովի իրեն անվերապահ ենթարկվող դատավորներին, որ հետո պարզվի՝ մեկի վճիռը դատախազությունը բողոքարկել է, մյուսի գործն էլ նորից պիտի քննվի, ու այդ ամենի համար լավ էլ փող կար, բայց տաժանակիր աշխատանք կատարող դատական կազմերի համար փող չկար:

Մարդկանց հայտնի կենդանու տեղը դնել պետք չէ. այդ մարդիկ ամեն ինչ շատ լավ հասկանում են: Հենց դրանով էլ պայմանավորված է նրանց այսօրվա գործադուլը: