Տուժող կողմ չկա, բայց կա մեղադրվող․ մեկ ամիս է՝ Մարտակերտի քաղաքապետը կալանքի տակ է

Այսօր ուղիղ մեկ ամիս է, ինչ Մարտակերտի քաղաքապետ Միշա Գյուրջյանը կալանքի տակ է։

MediaHub-ի հետ զրույցում որդին՝ Գրիգորի Գյուրջյանն ասաց, որ վաղը որոշիչ օր է լինելու․ դատարանը պետք է վճիռ կայացնի։ 

«Հայրս մեղադրվում է իբր խարդախությամբ խոշոր չափերով հափշտակության և փաստաթղթեր կեղծելու համար։ Մեղադրանքն առնչվում է ավտոմեքենայի «հափշտակությանը»։ Այս մասով մեծ աշխատանք է կատարել իր փաստաբանը, Մարտակերտ համայնքի ավագանին է բացատրություն տվել, անգամ նրանցից մեկը գտնվում է ՌԴ-ում, այնտեղից օնլայն է միացել։ Ամեն ինչ կատարվել է օրենքի սահմաններում։ Տուժող կողմ չկա, բայց կա մեղադրվող։ Անհամբեր սպասում ենք վաղվա վճռին։ Գոնե տնային կալանք տան, մեր կողքին լինի»,- ասաց Գրիգորին։

Նշենք, որ Միշա Գյուրջյանը Մարտակերտ քաղաքի երկարամյա ղեկավարն էր։ Այժմ գտնվում է Նուբարաշենի կալանավայրում։ Հավելենք, որ մայիսի 23-ին էլ իրավապահ մարմինները խուզարկություն են իրականացրել Ասկերանի նախկին քաղաքապետ Հայկ Շամիրյանի տանը, ինչից հետո ձերբակալել են նրան։ Առաջին ատյանի դատարանը մայիսի 24–ին Շամիրյանի նկատմամբ որպես խափանման միջոց ընտրեց տնային կալանքը։ Իսկ մայիսի 25–ին, ձերբակալվել է նաև Ստեփանակերտի քաղաքապետ Դավիթ Սարգսյանը։ Մեղադրանքը նույնն է` խարդախություն և փաստաթղթերի կեղծում։

«Մարդիկ մեղադրվում են նրա համար, որ գույքը չեն թողել ադրբեջանցիներին, այլ հնարավոր տարբերակով տեղափոխել են Հայաստան։ Այնքան «ինչո՞ւ»-ներ կան այս ձերբակալությունների, խուզարկությունների, կալանավորումների մեջ, որ չգիտեմ պատասխանները։ Մի՞թե հնարավոր է այսպես վարվել։ Նորից եմ կրկնում՝ այն դեպքում, երբ տուժող կողմ չկա»,- հավելեց մեր զրուցակիցը։