Հայաստանը մեր ազնիվ հարևանն է. Իրանի դեսպան

Հայաստանում Իրանի դեսպան Մեհդի Սոբհանին վստահ է, որ Իրանում կայացած նախագահական ընտրությունների արդյունքներն էլ ավելի կամրապնդեն Թեհրանի և Երևանի միջև հարաբերությունները։ Այս մասին նա լրագրողներին ասել է դիվանագիտական ​​ներկայացուցչությունում քվեարկությունից հետո։

Ինչպես հայտնել ենք, այսօր Իրանում արտահերթ նախագահական ընտրություններ են։ Հայաստանում բացվել է երկու ընտրատեղամաս՝ դեսպանատան և Կապույտ մզկիթի մոտ։

Դիվանագետը Երևանում դեսպանատանը լրագրողներին ասել է, որ Իրանի քաղաքականությունը Հայաստանի հետ հարաբերություններում սկզբունքային է։ Ով Իրանում իշխանության է գալիս, գործում է այս սկզբունքային քաղաքականության շրջանակներում։ Հայաստանի նկատմամբ Իրանի մոտեցումները բարձրաձայնել են Գերագույն առաջնորդը, այդ թվում՝ Հայաստանի վարչապետի հետ հանդիպմանը։

«Մենք հարգում ենք տարածքային ամբողջականությունը և դեմ ենք միջազգայնորեն ճանաչված սահմանների ցանկացած աշխարհաքաղաքական փոփոխության: Այդ քաղաքականությունը երբեք չի փոխվի՝ անկախ Իրանում և Հայաստանում կառավարությունների փոփոխությունից»,- հավելել է Սոբհանին։

Նա Հայաստանին անվանել է լավ և ազնիվ հարևան՝ նշելով, որ երկու երկրների անվտանգությունն ու շահերը սերտորեն կապված են։ Սոբհանին նաև կարծում է, որ Հայաստանը մեծ ուշադրությամբ է հետևում Իրանում ընտրական գործընթացին։