Առանձնապես խոշոր չափերի կաշառք ստանալու գործով դատական նիստը հետաձգվեց

«Երևանի գեղարվեստի պետական ակադեմիա» ՊՈԱԿ-ի պատասխանատու անձանց կողմից առանձնապես խոշոր չափերի կաշառք ստանալու դեպքի առթիվ հարուցված քրեական գործի առաջին դատական նիստն այսօր հետաձգվեց ամբաստանյալներ Արմինե Ենոքյանի և Արայիկ Ֆահրադյանի պաշտպան Վաղարշակ Գևորգյանի բացակայության պատճառով: Պաշտպանը գրությամբ դիմել էր գործով նախագահող, Երևանի Կենտրոն և Նորք-Մարաշ վարչական շրջանների դատավոր Մխիթար Պապոյանին՝ տեղեկացնելով, որ նախօրոք նշանակված այլ դատական նիստով զբաղվածության պատճառով չի կարող մասնակցել հիշյալ նիստին և խնդրելով, որպեսզի իր բացակայությունը չընկալվի որպես դատարանի հանդեպ անհարգալից վերաբերմունք:

Դատարանը ճանաչեց փաստաբաններ Լուսինե Սահակյանի ու Երվանդ Վարոսյանի լիազորությունները որպես ամբաստանյալ Հայկ Փայասլյանի պաշտպաններ: Դատարանը հաջորդ դատական նիստը նշանակեց դեկտեմբերի 20-ին այն հաշվարկով, որ Լ. Սահակյանն ու Ե. Վարոսյանը հասցնեն ծանոթանալ 3 հատոր կազմող գործի նյութերին:

Ըստ գործի տվյալների, «Երևանի գեղարվեստի պետական ակադեմիա» ՊՈԱԿ-ի պրոռեկտոր Ս. Գևորգյանը և ակադեմիայի համակարգչային գրաֆիկայի և դեկորատիվ կիրառական արվեստի ամբիոնի վարիչ Հ. Փայասլյանը, հանդիսանալով առանձին լիազորությամբ կազմակերպական-տնօրինչական գործառույթ իրականացնող պաշտոնատար անձինք, միաժամանակ' 2012-2013 թթ ուսումնական տարվա ընդունելության քննությունների ընդունող հանձնաժողովի' համապատասխանաբար նախագահի տեղակալ և պատասխանատու քարտուղար և հիշյալ քննությունների ընթացքում առաջացած խնդիրների որակյալ և արդյունավետ կատարման համար անձնական պատասխանատվություն կրող, ինչպես նաև' հանձնաժողովի մյուս անդամների աշխատանքները կազմակերպելու և դիմորդներին օգնություն ցույց տալու լիազորությամբ օժտված պաշտոնատար անձինք, իրենց վերապահված լիազորություններն օգտագործել են ծառայության շահերին հակառակ: Այս մասին հաղորդում է «փաստինֆոն»

Նախաքննության տվյալներով' Ս. Գևորգյանը և Հ. Փայասլյանը, օգտագործելով իրենց պաշտոնեական դիրքը, 2012թ ապրիլին ակադեմիայի կերպարվեստի ֆակուլտետի դեկան Խ. Ազիզյանի միջնորդությամբ ընդունել են ակադեմիայի դիմորդ Էդուարդ Բարբարյանի ծնողներից' Ա. Ենոքյանից և Ա. Ֆահրադյանից, առանձնապես խոշոր չափերի 1.371.510 ՀՀ դրամին համարժեք 3.500 ԱՄՆ դոլար ստանալու առաջարկը: Այնուհետև 2012թ մայիսին Խ. Ազիզյանի միջոցով Ս. Գևորգյան և Հ. Փայասլյանը Ա. Ենոքյանից և Ա. Ֆահրադյանից ստացել են առանձնապես խոշոր չափերի' 1.371.510 ՀՀ դրամին համարժեք 3.500 ԱՄՆ դոլար կաշառք' ակադեմիայի դիմորդ Է. Բարբարյանի քննությունների արդյունքներն ակադեմիա ընդունվելու համար անցողիկ միավորներով ապահովելու միջոցով ակադեմիա ընդունելու համար:

Ձեռք բերված ապացույցների հիման վրա Ս. Գևորգյանին և Հ. Փայասլյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափերի կաշառք ստանալը, Խ. Ազիզյանին' ՀՀ քրեական օրենսգրքի 313-րդ հոդվածի 1-ին մասով՝ կաշառքի միջնորդությունը, իսկ Ա. Ֆահրադյանին և Ա. Ենոքյանին' ՀՀ քրեական օրենսգրքի 312-րդ հոդվածի 3-րդ մասի 1-ին կետով՝ առանձնապես խոշոր չափերով կաշառք տալը: