Օգանովսկու որդուն ոստիկանները պառկեցրել են գետնին, քաշել մազերից․ Հրապարակ

«Հրապարակ»-ի տեղեկություններով՝ Սարյան փողոցում ոստիկանության ծառայողները կանգնեցրել եւ դիմակավորված անձանց օժանդակությամբ խուզարկել են գեներալ Սամվել Կարապետյանի (Օգանովսկու) որդու՝ Վալերի Կարապետյանի անձնական ավտոմեքենան։ «Ախպերս ինչ եք անում» արտահայտության համար իրավապահները Փաշինյանի սիրած ձևով` Կարապետյանին եւ նրա ընկերոջը ուղղակի «փռել են ասֆալտին», կիրառել ֆիզիկական ուժ, քաշել Օգանովսկու որդու մազերից, առանց որևէ հիմքի ավտոմեքենան տեղափոխել հատուկ պահպանման վայր։ Դեպքը տեղի է ունեցել երեկ գիշերը, իրավապահները հրաժարվում են վերադարձնել ավտոմեքենան։ 

Այս առնչությամբ «Հրապարակը» խոսեց Սամվել Կարապետյանի փաստաբան Ռոման Երիցյանի հետ։ Նա մեզ հետ զրույցում ասաց, որ ավտոմեքենան կանգնեցնելու պատճառը իբրեւ թե ուժեղացված ծառայությունն է եղել։ «Գետնին պառկեցնելունը՝ «ախպերս, ի՞նչ եք ուզում» արտահայտությունը, մեքենան չվերադարձնելունը՝ «քննարկման փուլում է» հիմարությունը։ Խուզարկության արդյունքում քրեաիրավական գնահատման ենթակա ոչինչ չի հայտնաբերվել։ Հայտնաբերվել է ընդամենը «դռիկ» կոչվող սարքը: Խախտումը տեղում վերացվել է, վարորդը չի առարկել, պարեկները հանել են այն։ Նշեմ, որ խուզարկությունն ապօրինի  է եղել, քանի որ դատարանից որոշում չեն ունեցել, անգամ նախաձեռնված քրեական վարույթ չկա։ Ավելի քան վստահ եմ, որ այդ գործողությունը պլանավորված օպերացիա է եղել, քանի որ դեպքի վայրում են եղել նաեւ ՆԳՆ բարձրաստիճան պաշտոնյաներ, այդ թվում Քրեական ոստիկանության պետը, Պարեկային ծառայության պետը եւ այլ անձինք»,-պատմեց նա։ 

Ռոման Երիցյանը հիմնավոր կասկածներ ունի, որ մեքենան ամեն գնով տուգանային հրապարակ տանելու նպատակը դրա մեջ գաղտնալսող սարք տեղադրելն է եղել: