Ինչքան բռնաճնշումներն ավելացնեն, էդքան մարդկանց թիվն ավելանալու է. Գառնիկ Դանիելյան

171 քաղաքացի է բերման ենթարկվել այսօր հանրապետության տարբեր բնակավայրերում խաղաղ անհնազանդության ակցիաների իրականացման ժամանակ, Սուրբ Աննա եկեղեցու մոտ օրվա ամփոփման ժամանակ ասաց պատգամավոր Գառնիկ Դանիելյանը։

«Բռնաճնշումները ոչ մեկի վրա չի ազդում, ինչքան բռնաճնշումներն ավելացնեն, էդքան մարդկանց թիվն ավելանալու է»,-հավելեց Գառնիկ Դանիելյանը:Գառնիկ Դանիելյանը Սուրբ Աննա եկեղեցու բակում ընթերցեց այն բոլոր փողոցների անունները, որոնք փակվել էին այս օրվա ընթացքում։

«Երևանում՝ Մալյան փողոց, Միասնիկյան պողոտա, Աբովյան փողոց, Թբիլիսիի խճուղի, Հանրապետության փողոց, Կոմիտաս-Գյուբենկյան խաչմերուկ, Տերյան, Բյուզանդ, Վարդանանց, Սարգավակի փողոցներում, Քոչարյան-Վաղարշ խաչմերուկում, Թումանյանի երեք հատվածներում, Խանջյան, Մոսկովյան, Բաղրամյան փողոցները։ Ինչպես նաև՝ Հայաստան-Վրաստան միջպետական ճանապարհի Բագրատաշեն հատվածը, Երևան-Սևան մայրուղին, Հայաստան-Իրան մայրուղին, Երևանի հարավային դարպասը, Վայքի հատվածը, Գեղարքունիքի,Արագածոտնի, Արարատի և Տավուշի մարզերում իրականացվել են իրազեկման ավտոերթեր։ Մեր արժանապատիվ 171 քաղաքացի բերման է ենթարկվել, որոնք առանց վախի և տրտնջալու իրականացրել են ակցիաները։ Փաստաբաններին էլ ծափահարենք, որոնք գիշեր-ցերեկ քաղաքացիների կողքին են և աջակցում են։ Ուրախությամբ պետք է նշենք, որ այս պահին բոլորն ազատության մեջ են, եթե այս ընթացքում ակցիա չի իրականացվել»,- ասաց Դանիելյանը։