«Այդ «գյադային» պետք է հեռացնել. Բագրատ սրբազանի քայլերը ճիշտ են՝ «պրոմըխ» չկա». Աշոտ Ավագյան

«Տավուշը հանուն հայրենիքի» շարժումը մայիսի 9-ից բողոքի ակցիաներ, հանրահավաքներ է իրականացնում Երևանում։ Տավուշի թեմի առաջնորդ Տեր Բագրատ եպիսկոպոս Գալստանյանի առաջնորդած շարժումը՝ մայիսի 4-ին Կիրանց գյուղի 96-ամյա բնակիչ Լենա տատիկի օրհնությունը ստանալուց հետո, քայլերթով շարժվեց դեպի Երևան: Երևանում առաջին հանրահավաքի ժամանակ Բագրատ սրբազանը հստակ ձևակերպեց շարժման պահանջը՝ Նիկոլ Փաշինյանի հրաժարականը՝ ԱԺ-ում անվստահություն հայտնելու միջոցով։

Շարժման մեկնարկը տրվեց, երբ ապրիլի 19-ին Նիկոլ Փաշինյանը հայտարարեց, որ Տավուշում Ադրբեջանի հետ տեղի կունենա սահմանազատում, որի արդյունքում «/2,5 գյուղ Հայաստանը կզիջի Ադրբեջանին, փոխարենը՝ կստանա Հայաստանի վրա Ադրբեջանի կողմից հարձակման ռիսկերը նվազեցնելու երաշխիքներ»։ Իշխանությունների որոշմանն ընդդիմացող քաղաքացիները, այդ թվում՝ միջազգային իրավունքի բազմաթիվ փորձագետներ, առ այսօր հայտարարում են, որ Նիկոլ Փաշինյանի սկսած գործընթացը ոչ թե սահմանազատում է, այլ ՀՀ տարածքների միակողմանի զիջում Ադրբեջանին, ինչը պետք է կասեցնել։

Չնայած քաղաքացիների բողոքի ակցիաներին՝ Նիկոլ Փաշինյանը և իշխանության տարբեր ներկայացուցիչներ համառորեն շարունակում են պնդել, թե մեկնարկած գործընթացը պետք է հասցնել ավարտին։

168.am-ի հետ զրույցում «Սիսական» ջոկատի կամավորական, նկարիչ Աշոտ Ավագյանն ասաց, որ Նիկոլ Փաշինյանի Տավուշում սկսած գործընթացը շարունակվելու է նաև Սյունիքում, եթե, իհարկե, մինչ այդ նրան ժողովուրդը չհեռացնի։

«Հարցնում եք՝ ո՞րն է հայ ազգի անելիքը հիմա, ասեմ՝ այդ գյադային պետք է հեռացնել, այդքան բան։
Այն, ինչ մինչև այսօր արել է Բագրատ սրբազանը, ճիշտ է, որևէ «պրոմըխ» չկա։ Մինչև հիմա նրա արած քայլերը դրական եմ գնահատում, ամբողջ հարցն այն է, թե անվստահության համար կարո՞ղ են բավարար ձայն հավաքել, թե՞ ոչ»,- շեշտեց նկարիչը։

Ըստ նրա, որպեսզի իշխանական պատգամավորներն անվստահություն հայտնեն Նիկոլ Փաշինյանին, նրանց պետք է համոզել, ներկայացնել երկրում տիրող իրավիճակը, գուցե շատերը չեն ուզում տեսնել իրենց բերած իրականությունը։
«Պետք է համոզել, պետք է ասել, որ հանգիստ հեռանան, թողնեն այս երկիրը փրկենք։ Պետք է համոզել և՛ գործադիրում, և՛ օրենսդիրում։

Եթե Նիկոլ Փաշինյանը մնա, ապա ինչ արեց Տավուշում, նույնն անելու է Սյունիքում, ի վերջո, իշխանությունն իր ձեռքում է։

Ես չեմ ուզում տարբերակել սյունեցու ու տավուշեցու անելիքները, որովհետև սա երկրին է վերաբերում։ Բայց եթե Նիկոլ Փաշինյանը մնաց, ապա Սյունիքում կատարվող գործընթացների ժամանակ՝ վախենամ՝ այս թափը չլինի։ Հետևաբար, մարդկանց թափը, որը սկիզբ է առել փողոցում, պետք է պահել, որովհետև Բագրատ սրբազանը կարող է դա անել, նա շատ խարիզմատիկ է։ Չպետք է թողնել, որ ժողովուրդը կոտրվի, այդ շարժումը պետք է մինչև վերջ առաջ տանել»,- եզրափակեց Աշոտ Ավագյանը։