Անընդունելի պրոցես է՝ արցախահայերի նկատմամբ ճնշումները մեծանում են, ժամանակահատվածը պատահական չէ ընտրված. Արտակ Բեգլարյան

Արդեն երրորդ օրն է, ՀՀ իրավապահները խուզարկություններ են կատարում Արցախի Հանրապետությունից բռնի տեղահանված համայնքապետերի, քաղաքապետերի բնակարաններում։ Երկու օր առաջ Ադրբեջանի կողմից օկուպացված Ասկերանի քաղաքապետ Հայկ Շամիրյանի բնակարանում Հայաստանի իրավապահների կողմից խուզարկություն կատարվեց, այնուհետև նրան ձերբակալեցին, մեկ օր անց դատարանի որոշմամբ խափանման միջոցն ընտրվեց տնային կալանքը։ Երեկ իրավապահները ձերբակալել են Մարտակերտի քաղաքապետ Միշա Գյուրջյանին, նրան էլ մեղադրանք է առաջադրվել։ Իսկ այսօր խուզարկություն էր կատարվել Ստեփանակերտի քաղաքապետի բնակարանում։

168.am-ի հետ զրույցում Արցախի նախկին պետնախարար, մարդու իրավունքների նախկին պաշտպան Արտակ Բեգլարյանն արցախահայերի նկատմամբ իրականացվող քրեական հետապնդումներին և դրանց իրական նպատակներին անդրադառնալով, նկատեց՝ ամեն ինչ շատ հասկանալի է, հստակ է՝ իրավապահները կատարում են քաղաքական պատվեր, ընթանում է քաղաքական գործընթաց։

«Արցախահայերի նկատմամբ բռնաճնշումները մեծանում են, այս ամենը խիստ անընդունելի պրոցես է։ Իհարկե, այդ իրավական գործընթացների մանրամասներից տեղյակ չեմ, բայց առնվազն այնքանը, որքանը հրապարակային հայտնի է, ինձ համար ամեն ինչ ակնհայտ է։ Նախ, ժամանակահատվածը պատահական չի ընտրված: Այստեղ Բագրատ սրբազանի առաջնորդած շարժման կուլմինացիայի շրջանն է՝ այսպես ասած, որտեղ արցախցիները և Արցախի տարբեր գործիչներ կարևոր մասնակցություն ունեն, այդ թվում՝ համայնքների ղեկավարները, որպես մոբիլիզացնող հիմնական գործիչներ ու դերակատարներ»,- նշեց Արտակ Բեգլարյանը։

Արտակ Բեգլարյանի գնահատմամբ՝ այս ամենի պատճառն ու առիթը, որն օգտագործում են ՀՀ իշխանությունները, բավականին անընդունելի ու անհասկանալի է, քանի որ իր տեղեկություններով՝ համայնքների ավագանիների կողմից որոշումներ են ընդունվել, որպեսզի համայնքի գույքը կարողանան ինչ-որ ձևով տնօրինել։

«Ինքնին տվյալ գույքը, մեքենան, այսպես ասած, օդում կախված էր և ուներ իրավական կարգավիճակի խնդիր։ Որքան տեղյակ եմ, նույնիսկ ՀՀ ոստիկաններն են խորհուրդ տվել քաղաքապետերին, որ եթե լինի ավագանու որոշում, ապա դա իրենց համար հիմք կլինի, որպեսզի կարողանան փոփոխություններ կատարեն։ Հետևաբար, իրենց խորհրդին հետևելով, ավագանին նմանատիպ ընթացակարգով է հարցը լուծել։ Եթե կար այլընտրանք, թող ՀՀ ոստիկանությունը կամ ՀՀ լիազոր մարմիններն այլընտրանքային լուծում առաջարկեին, թե ինչպես պետք էր այդ մեքենաների իրավական կարգավիճակի հարցը լուծվեր։ Այս ամենից հետո ինձ համար արդեն հստակ է, որ նրանց ուղղորդմամբ տեղի է ունեցել այդ գործընթացը, և իրենք որոշել են, որ ավագանու որոշումն ապօրինի է»,- հավելեց Արցախի նախկին ՄԻՊ-ը։

Եվ Արտակ Բեգլարյանը տրամաբանական հարց բարձրացրեց՝ ինչպես են ՀՀ իրավապահ մարմիններն այլ երկրի, տվյալ դեպքում՝ Արցախի Հանրապետության համայնքների կամ պետական մարմինների որոշումների վերաբերյալ քրեական վարույթներ սկսում, հատկապես, երբ նման հիմք ընդհանրապես առկա չէ, այն դեպքում, երբ ՀՀ իշխանություններն արդեն տևական ժամանակ խուսափում են պատասխանատվությունից, այնինչ հենց իրենք են Արցախը ճանաչել Ադրբեջանի կազմում։

Ինչ վերաբերում է հարցին՝ մտավախություն չունի՞, որ իր բնակարանում էլ խուզարկություն տեղի կունենա, հատկապես, որ հայտարարել է մայիսի 26-ին սպասվող հանրահավաքին մասնակցելու իր պատրաստակամության մասին, Արտակ Բեգլարյանն ասաց՝ յուրաքանչյուր ոք, ով այս իշխանություններին քննադատում է, կարող է մտավախություններ ունենալ, կապ չունի՝ արցախցի՞ է, թե՞ ոչ։

«Ակնհայտ է, որ տարբեր դրվագներ, քրեական վարույթներ կան, որոնք քաղաքականապես մոտիվացիա ունեցող կամ հիմք ունեցող գործեր են, ցավոք, դրանք առնչություն չունեն որևէ իրավական գործընթացի հետ։
Ցավոք, այո, արցախցիներն այս պահին հիմնական թիրախներից մեկն են և քարոզչական, և իրավական, և քաղաքական դաշտում։ Այստեղ ինձ համար անընդունելի է, որ արցախցիների հավաքական թիրախավորման դեպքեր են լինում կամ փորձում են ներքաղաքական պայքարում արցախահայերի ներգրավվածությունը շահարկել, որտեղ շահարկման որևէ հիմք չկա։ Այդ շարժմանը մասնակցում են և՛ արցախցիները, և՛ ոչ արցախցիները, մենք այստեղ հավասարապես ունենք և՛ իրավունքներ և՛ պարտականություններ։ Իմ պարագայում, ես միշտ բաց եմ եղել ու հրապարակային արտահայտել եմ դիրքորոշումները, վախենալու որևէ բան չունեմ։ Նաև պատրաստ եմ ցանկացած պայքարի՝ արդար, ազնիվ ու իրավական պայքարի։ Մշտապես շարունակելու եմ պայքարը և՛ Հայաստանի ներսում, և՛ Հայաստանից դուրս՝ միջազգային հարթակներում, հնարավորինս արցախահայերի իրավունքներն ու շահերը պաշտպանելու համար»,- նշեց Արտակ Բեգլարյանը։

Արտակ Բեգլարյանը ևս մեկ անգամ ընդգծեց՝ համայնքին պատկանող գույքի ճակատագիրը պետք է որոշի հենց համայնքը՝ ավագանին։